Bakı Şəhər İcra Hakimiyyəti tərəfindən Yasamal rayonu ərazisində qanunsuz tikinti işləri aparan “Lake Residence” Məhdud Məsuliyyətli Cəmiyyətinin (MMC) rəhbərliyinə xəbərdarlıq edilib.

"Xeberinfo.com":  Bakı meriyasından virtualaz.org-a verilən məlumata görə, tikinti şirkəti tərəfindən aparılan qanunsuz tikinti işləri ləğv edilib. Ərazidəki gölün doldurulmuş hissəsi təmizlənib. Ətrafdakı əhalinin istirahətinin mənalı təşkili üçün ərazidə yüksək səviyyədə abadlaşdırma işlərinin öz vəsaiti hesabına həyata keçirilməsi “Lake Residence” MMC-yə tapşırılıb.

Eyni zamanda, sözügedən ərazidə tikintiyə icazə sənədi almadan tikinti işlərini həyata keçirən və gölün bir hissəsini qanunsuz olaraq zəbt edərək dolduran “Lake Residence” MMC rəhbərliyinin qanunsuz əməllərinin araşdırılması və müvafiq tədbirlər görülməsi barədə göstərişlər verilib.

Eləcə də rəhbərlik etdiyi rayonun ərazisində tikintiyə müvafiq icazə sənədi olmadan aparılan tikinti işlərinin qarşısının vaxtında alınmaması və bu istiqamətdə işlərin yüksək səviyyədə həyata keçirilməsində nöqsanlara yol verdiyini nəzərə alaraq, Yasamal Rayon İcra Hakimiyyətinin başçısı İbrahim Əsgər oğlu Mehdiyevə töhmət verilib.

Qeyd edək ki, Azərbaycan prezidentinin müvafiq tapşırığına əsasən, Bakı Şəhər İcra Hakimiyyətinin apardığı araşdırma zamanı müəyyən edilib ki, “Lake Residence” MMC tikinti işlərinin aparılması üçün müvafiq icazə sənədi alınmadan Yasamal rayonu, 593-cü məhəllə, Genaral Akim Abbasov küçəsi, 25 saylı ünvanda qanunsuz olaraq tikinti işlərinə başlayıb. Həmin ərazidə mövcud olan gölün bir hissəsinin tikinti qırıntıları ilə doldurulması həyata keçirilib.