Ermənistandakı Böyük Britaniya səfirliyinin himayəsi altında qeyri-formal gizli klub fəaliyyət göstərir və erməni elitasının bir çox nümayəndələri həmin klubun üzvlərdir.

 Yenixeber.org: Bu iddia ilə rusiyalı hərbi ekspert, “Milli müdafiə” jurnalının baş redaktoru İqor Korotçenko Ermənistanda nəşr edilən “168 saat” qəzetinə müsahibəsində çıxış edib.

“Biz qeyd etməliyik ki, əlimizdə olan məlumatlara görə indiki erməni elitasının bir sıra yüksək rütbəli məmurları Böyük Britaniya səfirliyinin nəzdindəki qeyri-formal klubun üzvləridir. Yeri gəlmişkən mən etibar etdiyim mənbələrə istinad edib deyə bilərəm ki, müdafiə naziri David Tonoyan və baş nazir Nikol Paşinyanın həyat yoldaşı Anna Akobyan, habelə indiki erməni istebleşmentinin digər nüfuzlu nümayəndələri həmin klubda yer alır”-Korotçenko deyib.

Rusiyalı hərbi ekspert qeyd edib ki, həmin qeyri-formal klub Ermənistanın Rusiya ilə münasibətlərini özünün sonrakı siyasətinin strateji istiqaməti kimi nəzərdən keçirə bilməz. Ona görə də Rusiyada Ermənistanla münasibətlərin keyfiyyətini sözlərlə deyil, ancaq praktiki hərəkətlərlə qiymətləndirəcəklər.

“Beləliklə, hər şey Yerevandan asılıdır. Rusiya Ermənistanla münasibətləri bütün istiqamətlərdə dərinləşdirməkdə maraqlıdır, lakin Yerevanın eyni vaxtda iki stulda oturmaq cəhdini Moskvada aydın məsələdir ki, qəbul etməyəcəklər”-Korotçenko bildirib.

Ermənistan Müdafiə Nazirliyi isə Korotçenkonun dediklərini “sağlam düşüncədən uzaq fikirlər” adlandırıb. Nazirlikdə deyiblər ki, “sağlam düşüncə ilə ziddiyət təşkil edən” bəyanatları şərh etmək fikrindən uzaqdırlar.(virtualaz)