Yenixeber.org:  “Başa düşdüyüm qədər AZAL-ın Prezidenti Cahangir Əsgərovun öhdəsindən gələ bilinmir. Bu gün hamı ağzıdolusu iqtisadiyyatda sərbəstlikdən, azad rəqabətdən, inkişafdan, turizmdə sıçrayışdan danışır… Ancaq ölkədə təyyarə ilə sərnişindaşımanın 99 faizinin AZAL-ın həyata keçirdiyi vaxtda hansı rəqabətdən danışmaq olar? Uzun müddətdir yazıram ki, ucuz hava xətləri bütün dünyanı bürüyüb, Azərbaycana isə girə bilmir, çünki bura sanki Əsgərovun dədə mülküdür”.

Bunu tanınmış vəkil Aslan İsmayılov dilə gətirib.

Onun sözlərinə görə, bir ara həmin xətləri guya buraxdılar, az sonra öz korrupsiya əməlləri ilə yoxa çıxartdılar.

“Milyardlar xərclənmiş infrastrukturalar yaxın zamanlarda sıradan çıxacaq, mehmanxanalar kif bağlayacaq ki, Əsgərovun gözü doysun. O da doymaq bilmir. Bir ərəblərin Azərbaycana gəlməsi turizmin inkişafı deyil. Hələ bu gəlişin gələcəkdə Azərbaycana hansı bəlaların gətirəcəyini demirəm.

Normal ölkələrin turistləri isə AZAL-ın bu bahalı biletləri ilə bura gələn deyillər. İş o yerə gəldi ki, Azərbaycana uçan türk Peqasus şirkəti bizə uçuşunu datyandırıb Yerevana uçuş xətti açdı, yəni bizimlə müharibə vəziyyətində olan dövlətin iqtisadiyyatını inkişaf etdirəcək…”-deyə, o, daha sonra sözlərinə əlavə edib.