İran prezidenti Həsən Ruhani bir müddət əvvəl ölkəsində etiraz dalğasına yol açmış iqtisadi-sosial problemləri həll etmək üçün əlindən gələni edəcəyinə söz verib

Yenixeber.org: Bu barədə İran dövlət başçısı dövlət telekanalına verdiyi müsahibədə danışıb.

“Xalqıma demək istəyirəm ki, problemlərin mövcud olmasına, insanların hələ öz arzu və tələblərinə nail olmadığına baxmayaraq, iqtisadi, sosial və mədəni şərait yaxşılaşacaq, hökumət xalqın dəstəyi ilə sosial-iqtisadi problemləri həll etməyə qadirdir”, – deyə Ruhani bildirib.

Ruhani ölkədə internet istifadəçilərinin müxtəlif saytlara məhdudiyyətsiz girişinin təmin olunacağına söz verib.

“Kiberməkan və onun azadlığını təmin etmək hökumətə elə də asan başa gəlmir, hökumət böyük çətinliklərə dözməli olur. Söhbət 11-ci və 12-ci hökumətlərdən gedir. Allahın köməyilə bütün dövlət rəsmiləri internetə girişlə bağlı azadlığı təmin etmək üçün əlindən gələni edəcək”, – deyə Ruhani vurğulayıb.

Yayılan məlumatlara görə, İranda dekabrın sonlarında başlayan etiraz dalğasından iki həftə sonra İranın Ali lideri Ayətullah Əli Xamenei İnqilab Keşikçiləri Korpusuna ölkə iqtisadiyyatına nəzarəti yüngülləşdirməsi ilə bağlı göstəriş verib. Korpus hazırda İran iqtisadiyyatının 1/3 hissəsini idarə edir.

Xatırladaq ki, İranda sosial-iqtisadi problemlərdən qaynaqlanan etiraz aksiyaları ötən ilin dekabr ayının 28-dən başlayaraq Tehran, Məşhəd, İsfahan və Rəşt kimi iri şəhərlərdə keçirilib.