Ərəb KİV-ləri Azərbaycan, Türkiyə və Gürcüstanın dəmir yolları şəbəkəsini, Asiya və Avropanı Qafqaz regionu vasitəsilə birləşdirəcək Bakı-Tbilisi-Qars dəmir yolunun işə salınmasını geniş işıqlandırır

Yenixeber.org:  Misirin “Arabsola” nəşrində yer alan “İlham Əliyev: Güclü iradə Bakı-Tbilisi-Qars layihəsini reallaşdırmağa imkan yaratdı” sərlövhəli məqalədə Azərbaycan dövləti başçısının yeni Asiya-Avropa dəmir yollarının istifadəyə verilməsinin strateji əhəmiyyətini vurğuladığı çıxışından sitatlar gətirilir: “Onu da qeyd etməliyəm ki, bir çoxları, xüsusilə bəzi xarici dairələr Bakı-Tbilisi-Qars dəmir yolunun tikintisinə inanmırdılar. Hesab edirdilər ki, bunun reallaşması mümkün deyil, bunun reallaşması üçün lazım olan texniki imkanlar və maliyyə vəsaiti imkan verməyəcək ki, bu layihə gerçəkləşdirilsin. Ancaq üç ölkə göstərdi və sübut etdi ki, bu, mümkündür. Bizim güclü iradəmiz, qarşılıqlı dəstək, bir-birimizə inam olan yerdə bütün işləri görmək mümkündür. Bakı-Tbilisi-Qars dəmir yolunun tikintisi bunun əyani misalıdır. Əminəm ki, regional əməkdaşlığa ən böyük töhfə verən ölkələr - Azərbaycan, Gürcüstan və Türkiyə bundan sonra da daim bir yerdə olacaqlar, bir-birini dəstəkləyəcəklər. Bakı-Tbilisi-Qars dəmir yolu layihəsi kimi nəhəng layihələr bizim birliyimizi, dostluğumuzu daha da möhkəmləndirir”. Azərbaycan Prezidentinin sözlərinə görə, Bakı-Tbilisi-Qars dəmir yolu Avropanı Asiya ilə birləşdirən ən qısa və etibarlı yoldur.

Bakı-Tbilisi-Qars dəmir yolunun açılış mərasimi haqqında məqalələr, Prezident İlham Əliyevin çıxışından sitatlar, bu layihənin Asiya və Avropa üçün əhəmiyyəti barədə materiallar ərəb KİV-lərinin çoxunda, o cümlədən MENA Dövlət İnformasiya Agentliyində, “Al Youm Al Sabia”, “Al Şark Al Ausat”, “Royanyus”, “Vatannyus”, “Axbarak” və digər nəşrlərdə yerləşdirilib.