Qondarma “Donetsk Xalq Respublikası”nın rəhbərliyi rəsmi Kiyevlə sülh danışıqlarına hazırdır və bir çox tələblərindən imtina etməyə razıdır. 

"Xeberinfo.com" xarici mediaya istinadən xəbər verir ki, bu açıqlama ilə “DXR”in baş naziri Aleksandr Boroday çıxış edib. 

A.Boroday bildirib ki, “DXR” atəşkəs elan olunmasına dair danışıqları davam etdirməyə hazırdır: “Təbii ki, qarşı tərəfin buna razılığı olarsa. İndiki vəziyyətdə əsas məsələ məsləhətləşmələrin vaxtı və yeridir. Təəssüf ki, danışıqlar aparan qrup hərbi əməliyyatlara görə Donetskə gəlməyə risk etmir”. 

“DXR” baş naziri əmin edib ki, Donetskə gəlməyə razı olacaqları təqdirdə məsləhətləşmə iştirakçılarının təhlükəsizliyinə tam zəmanət verilir. 

Xatırladaq ki, iyunun sonlarında Donetskdə Ukrayna, Rusiya, ATƏT, həmçinin qondarma “DXR” və “Luqansk Xalq Respublikası”nın nümayəndələrinin iştirakı ilə danışıqlar təşkil olunub. Lakin əhəmiyyətli nəticələr hələ əldə olunamayıb. 
İyunun 30-da Petr Poroşenko qüvvədə olan atəşkəs rejimini ləğv edib.