Türkiyə Xarici İşlər Nazirliyi Belçika parlamentinin Nümayəndələr Palatasının “erməni soyqırımı” ilə bağlı qəbul etdiyi qətnaməni pisləyib.
"Xeberinfo.com":   APA-nın məlumatına görə, rəsmi Ankara belçikalı deputatlara digər problemlərlə məşğul olmağı məsləhət görüb.
“Bu qərar tarixi faktları təhrif edir və qanuna məhəl qoymur, habelə Belçika-Türkiyə münasibətlərinə dərin təsir göstərir”, – deyə bəyanatda vurğulanıb.
Bəyanatda həmçinin qeyd edilib ki, Avropanın çətin vaxtlarında Belçika parlamentariləri ölkə vətəndaşlarının rifahını düşünmək əvəzinə Türkiyə-Belçika münasibətlərinə yad olan məsələ üçün çalışırlar.
“Bu cür qərarlar erməni-türk barışığı üçün də xidmət etmir”, – deyə bəyanatda qeyd edilib.
Xatıraldaq ki, Belçika parlamentinin Nümayəndələr Palatası dünən “erməni soyqırımı”na dair qətnamə qəbul edib. Səsvermə zamanı 124 deputat sənədin lehinə səs verib, 8 deputat bitərəf qalıb, əleyhinə isə səs verən olmayıb.
Əlavə edək ki, Belçika Senatı uydurma “erməni soyqırımı”nı 1998-ci ildə tanıyıb.