AZ
RU
AB liderlərindən referendum açıqlaması
Avrozonaya üzv ölkələrin rəhbərləri iyulun 7-də müşavirəyə çağırılırlar
"Xeberinfo.com": Fransanın prezidenti Fransua Olland və Almaniya kansleri Anqela Merkel Yunanıstanda keçirilən referendum nəticələrinin dəyərləndirilməsi üçün Avrozonaya üzv ölkələrin rəhbərlərini müşavirəyə çağırıblar. Yelisey sarayı mətbuat mərkəzi ötən axşam Fransua Ollandla Anqela Merkel arasında telefon danışığı baş tutduğunu bəyan edib. Bəyanatda hər iki ölkə rəhbərinin, yunan xalqının seçiminə hörmət göstərilməsi mövzusunda həmfikir olduqları bildirilib.
Həmin açıqlamada, Olland və Merkelin Avrozonaya üzv ölkələrin rəhbərlərinin çərşənbə axşamı günü toplanması üçün Avropa Şurasının sədri Donald Tuska müraciət etdikləri qeyd edilib.
Həmçinin referendum nəticələrini dəyərləndirmək üçün Avropa Komissiyasının sədri Jan Klod Yunker və Avropa Parlamentinin sədri Martin Şultsla telefonla danışdığı bildirilən Ollandın baş nazir Manuel Valls və digər nazirlərlə də görüşdüyü bildirilib.
Bundan başqa Ollandla Yunanıstanın baş naziri Aleksis Tsipras arasında da telefon danışığı olduğu bildirilib.
Fransua Ollandla Anqela Merkelin isə referendum nəticələrini müzakirə etmək üçün bu gün Parisdə görüşəcəkləri açıqlanıb.
