Bakının Mirqasımov 8 və Süleyman Rüstəmov 193 ünvanlarındakı fərdi yaşayış evlərində yaşayan sakinlər çarəsiz durumdadır.

Yenixeber.org:   Sakinlərin Modern.az-a verdiyi məlumata görə, yeni binanın inşası üçün vətəndaşlar məcburi şəkildə evlərindən çıxarılır. Onların sözlərinə görə, bütün bunların səbəbkarı özəl şirkət olan “Uniklinika”nın rəhbəri Əli Həsənovdur:

“Əli Həsənov ərazidəki 14 mənzildən 8-ni öz vəsaiti hesabına almışdı. Ötən il ərazidə klinika tikilməsi məqsədilə söküntü işlərinə başlanıldı. Bizim şikayətlərimiz əsasında söküntü dayandırıldı”.

Nəsimi rayon İcra Hakimiyyətindən sakinləri Ə.Həsənovun ərazidə tikinti aparmaq üçün bütün sənədlərinin olduğunu bildiriblər. 6 ay sonra Ə.Həsənov sakinlərə deyib ki, ərazidə yeni bina tikiləcək və hər bir sakinə ev veriləcək.

2016-cı ilin sentyabr ayında Nəsimi rayon İcra Hakimiyyətinin nümayəndəsi, 14 saylı Mənzil İstismar Sahəsinin rəisi, “Rifah Plaza”nın rəhbəri Şamil Xubyarov və Əli Həsənov sakinlərlə görüşüb.

Onlara bildiriblər ki, ərazi pilot layihəyə düşür, Nazirlər Kabinetinin 86 saylı qərarı var. Qərarı əsas gətirən şirkət rəhbəri “sizə kompensasiya ödənilməyəcək, yeni binada mənzil veriləcək” deməklə kifayətlənib.

Sakinlərin sözlərinə görə, onların yeni evlərə nə zaman köçürüləcəyi konkret deyilmir. Sakinlərə qaranlıq qalan məqamlara aydınlıq gətirilməsini istəyir. Lakin icra hakimiyyəti  məsuliyyəti şirkətin, şirkətsə icra hakimiyyətinin üzərinə atır. Sakinlər deyir ki, söküntü başlayanda adlarını qeyd etdikləri səlahiyyətlilər vətəndaşlara hədə-qorxu gəlib:

“Kimsə inandı, kimsə məcburiyyətdən, kimsə işinin itirəcəyi hədəsindən çəkinərək getdi. Süleyman Rüstəmov 193 ünvanından 11 nəfər, Mirqasımov 8 ünvanından isə bir nəfər Şuşa qaçqını getdi. Hazırda 9 ailə yaşayır. Bu ilin fevralından etibarən qaz xətlərimiz kəsilib. Qaz idarəsindən gələn işçilər bunu Nəsimi rayon İcra Hakimiyyətinin göstərişi ilə icra etdiklərini bildirdilər. Bizi öz evimizdən didərgin salırlar. Xahiş edirik aidiyyatı orqanlar səsimizi eşitsin”.