Xəbər verdiyimiz kimi, Rusiya Xarici işlər naziri Sergey Lavrov ötən gün Ermənistan və Azərbaycanın Dağlıq Qarabağ münaqişəsinin mərhələli şəkildə nizamlanmasına əsaslanan sənəd üzərində razılaşdıqlarını bəyan edib.
Yenixeber.org: Ermənistan Xarici işlər nazirliyinin sözçüsü Anna Nağdalyan Rusiyanın "Kommersant" qəzetinə verdiyi açıqlamada Sergey Lavrovun səsləndirdiyi fikirlərə münasibət bildirib.
Anna Nağdalyan deyib ki, hər iki ölkənin XİN rəhbərlərinin Moskva görüşdə danışıqların davam etdirilməsi ilə bağlı bəyanat qəbul edilib, lakin bu bəyanatda hansısa sənəd və ya mərhələli bir nizamlama barədə qeyd yoxdur.
Ermənistan  XİN sözçüsü qeyd edib ki, 2018-ci ilədək təqdim olunan Dağlıq Qarabağ münaqişəsinin nizamlanmasının mərhələli variantı Ermənistan üçün qəbuledilməzdir: “Bundan əlavə 2018-ci ildən bəri Ermənistan mərhələli tənzimləmə əsasında danışıqlar aparmır".
Onu da qeyd edək ki, dünən Ermənistan Xarici işlər naziri Zöhrab Mnatsakanyan da Sergey Lavrovun açıqlamasına cavab verərək danışıqlar prosesində münaqişənin mərhələli həlli ilə bağlı təkliflərin olduğunu inkar edib.