Dövlətimizin başçısının “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 2020-ci il 19 mart tarixli Fərmanına əsasən yaradılmış Koronavirusla Mübarizəyə Dəstək Fonduna Azərbaycan Respublikası Vəkillər Kollegiyası Rəyasət Heyətinin qərarı ilə 50 min manat vəsait köçürülüb.

Yenixeber.org: Vəkillər Kollegiyasından bildiriblər ki, dövlətimizin başçısının təşəbbüsü ilə başladılan və ölkə ictimaiyyətinin bütün təbəqələri tərəfindən həmrəy şəkildə dəstəklənən kampaniyaya vəkillər də biganə qalmayıb və onlar tərəfindən ayrıca təşəbbüslər şəklində də Dəstək Fonduna köçürmələr edilib.

Azərbaycan Respublikası Vəkillər Kollegiyası ölkəmizdə koronavirusla mübarizə üzrə təşəbbüsün başladılmasını alqışlayır, vəkillərin bu kimi sosial bəlalarla mübarizədə hər zaman dövlətimizin, habelə bu mübarizəyə dəstək verən hər kəsin yanında olduğunu bildirir, ölkəmizin bu pandemiyaya qalib gələcəyinə əminliyini bəyan edir.

Dəstək Fonduna köçürülmüş vəsait vəkilliyin inkişaf fonduna vəkillərin ödədikləri order markasından (xərcindən) yığılan vəsait hesabına köçürüldüyündən bu aksiyada bütün vəkillərin iştirakı təmin olunub.