Namizədliyə iddiaçılardan 4-ü deputatdır

Yenixeber.org: Azərbaycanda keçiriləcək növbədənkənar prezident seçkilərində iştirak etmək üçün daha bir partiya sədrinin namizədliyi fevralın 13-də irəli sürülüb. Azərbaycan Sosial-Demokrat Partiyası (ASDP) Mərkəzi Komitəsinin plenumu partiyanın lideri, deputat Araz Əlizadənin aprelin 11-də keçiriləcək seçkilərdə  namizəd kimi iştirak etməsi ilə bağlı qərar qəbul edib. Bununla da namizəd- deputatların sayı 4 nəfərə çatıb.

A.Əlizadə namizədliyi irəli sürülsə də seçkinin qalibi olmayacağını özü indidən etiraf edib: “Əlbəttə, prezident postu uğrunda mübarizənin şəksiz lideri İlham Əliyevdir. Mənim qarşımda isə partiyamız, ölkənin problemlərinin həllinə onun baxışı haqda danışmaq vəzifəsi durur və biz bunu edəcəyik”.

Prezidentliyə namizədliyi AXC təşəbbüs qrupu tərəfindən irəli sürülən yeni AXCP-nin sədri Razi Nurullayevin sənədləri isə fevralın 13-də Mərkəzi Seçki Komissiyasına təqdim edilib. Bu barədə AXCP Ali Məclisinin sədri Rafiq Daşdəmirli bildirib: “Seçki Məcəlləsinə uyğun olaraq 5 gün ərzində baxılıb cavab veriləcək. Ondan sonra rəsmi olaraq imza vərəqələri götürəcəyik”. R.Daşdəmirli onu qeyd edib ki, lazımi sayda (40 min) imza toplamaq çətin olmayacaq.

Fevralın 13-nə olan vəziyyətə görə prezidentliyə namizədliyi irəli sürülən şəxslərin sayı 11 nəfərə çatıb. Bunlar hakim Yeni Azərbaycan Partiyasının (YAP) sədri, hazırkı dövlət başçısı İlham Əliyev, Yeni AXCP-nin sədri Razi Nurullayev,  Milli Dirçəliş Hərəkatı Partiyasının sədri deputat Fərəc Quliyev, Azərbaycan Sosial Demokrat Partiyasının sədri deputat Araz Əlizadə, Müasir Müsavat Partiyasının sədri Hafiz Hacıyev, partiya mənsubiyyəti olmayan deputat Zahid Oruc, Azərbaycan Liberal Demokrat Partiyasının sədri Fuad Əliyev, AĞ Partiyanın sədri Tural Abbaslı, Bütöv Azərbaycan Xalq Cəbhəsi Partiyasının sədri deputat Qüdrət Həsənquliyev, Vətəndaş və İnkişaf Partiyasının sədri Əli Əliyev (Əli Əliyev son qərarını fevralın 17-si elan edəcək), KXCP sədri Mirmahmud Mirəlioğludur (M.Mirəlioğlu son qərarını fevralın 17-də elan edəcək).

2013-cü il prezident seçkisində namizəd olanların bir qismi bu siyahıda yer alır. Lakin sözügedən seçkidə iştirak etmiş şəxslərin bəziləri 11 apreldə keçiriləcək seçkiyə qatılmayacaqlarını elan ediblər. Bunlar Milli Şuranın sədri Cəmil Həsənli, Ümid Partiyasının sədri İqbal Ağazadə və Ədalət Partiyasının sədri İlyas İsmayılovdur. Azərbaycan Demokratik Partiyasının sədri Sərdar Cəlaloğlunun da budəfəki seçkidə iştirak etməyəcəyi gözlənilir. S.Cəlaloğlu bir həftə öncə “Yeni Müsavat”a açıqlamasında bildirmişdi ki, seçkidə iştirak edə bilməməsinin səbəbi maliyyə problemidir. Əgər vəsait tapa bilsə seçkiyə qatılacaq. Ötən seçkilərdə namizəd olmuş Ədalət Partiyasının sədri İlyas İsmayılov da builki növbədənkənar seçkilərlə bağlı qərarını açıqlamayıb.

Azərbaycan Kommunist Partiyası da dünən seçki iştirak edəcəklərini açıqlayıb. Partiyanın sədri Rauf Qurbanov modern.az deyib ki, növbədənkənar seçkinin keçirilməsi ilə əlaqədar prezidentin sərəncamı ilə tanış olandan sonra partiyanın Mərkəzi Komitəsinin katibliyi toplaşdı və mart ayının birinci on günlüyü üçün plenumun çağırılması planlaşdırılır.

YAP icra katibinin müavini, deputat Siyavuş Novruzov isə bildirib ki, prezidentliyə namizədliyini irəli sürmüş hər bir şəxs üçün şərait var: “Ölkədə ədalətli, demokratik, azad seçki keçirilməsi üçün bütün mühüm şərait var. Qanunvericiliyə uyğun olaraq, hər bir siyasi partiya, tələblərə uyğun olaraq isə hər bir vətəndaş namizədliyini irəli sürə bilər. Buna görə hər bir siyasi partiya üçün hər cür şərait yaradılıb. Seçkilərdə partiya rəhbərlərinin bir hissəsi iştirak edib, digər hissəsi iştirak etmirsə, bunun səbəbləri tamamilə başqadır. Səbəb ondan ibarətdir ki, o təşkilatlar xaricdən maliyyələşir. Onların bəziləri erməni lobbisinin, müəyyən təşkilatların təsiri altındadır. Onlara göstəriş verilib ki, ”seçkilərdə iştirak etməyin". Onlar da iştirak etməkdən imtina edib.  Ümumiyyətlə, onlara göstəriş versələr ki, “seçkilərdə  iştirak edin” edəcəklər, yaxud da əksinə. Bunlar nə dərnəyin üzvlərinin, nə də onların adi rəhbərinin qərarı ilə deyil, hansısa ayrı-ayrı ölkələrin, qeyri-hökumət təşkilatlarının, pul verən şəxslərin tapşırığı ilə oturub-dururlar. Ona görə də heç bir narahatlığa əsas yoxdur. Prezident seçkilərində iştirak edəcək namizədlərin hamısı da layiqli insanlardır, Azərbaycan vətəndaşlarıdırlar. Kimlər qanunvericiliyin tələblərinə uyğun olaraq, sənədlərini düzgün təqdim edəcəksə, imzalarını toplayıb verəcəksə, o da qeydiyyatdan keçəcək".