Qarabağla bağlı danışıqlarda fəallıq olmasa, növbəti ildə yay aylarında müharibə təhlükəsi yarana bilər

     Yenixeber.org:    Bu sözləri   açıqlamasında Azərbaycanın keçmiş xarici işlər naziri Tofiq Zülfüqarov deyib. Politoloq bildirib ki, Azərbaycan Dağlıq Qarabağ probleminin həllində birinci məsələni qismən həll etdi:

“Yəni Bakı İrəvanı danışıqlara qayıtmağa məcbur etdi. Ancaq Qarabağ problemi həll edilməmiş qalır. Ermənistan konkret mövqeyini nümayiş etdirmir. Əgər İrəvanın mövqeyində dəyişiklik olmasa, vəziyyət də dəyişməyəcək. Artıq bir məsələ də aydındır ki, Rusiya bir dövlət olaraq Ermənistanı tam şəkildə dəstəkləməyə hazır deyil, daha doğrusu, bunu istəmir. Ermənistan siyasi elitası və cəmiyyəti başa düşür ki, Qarabağ siyəsətində hansısa düzəlişlərə getməlidirlər. Əgər bu baş versə, onda hansısa irəliləyiş mümkündür. Əks təqdirdə isə vəziyyət elə bugünkü kimi də qalacaq”.

T.Zülfüqarov Dağlıq Qarabağ münaqişəsinin həllinin təkcə Azərbaycandan asılı olmadığını qeyd edib:

“Qarşı tərəf danışıqlarda hansısa şəkildə konstruktiv mövqe ortaya qoymalıdır ki, Azərbaycan öz maraqlarının müdafiəsində irəliləyişə nail olsun. Ermənistan buna meyilli olmadığından problemin həllində heç bir irəliləyiş baş vermir. Ona görə də Azərbaycan aktiv xarici siyasət xəttini davam etdirməli, tərəfdarlarının sayını artırmalıdır. Ən əsası isə dövlətçiliyini və müdafiə imkanlarını daha da gücləndirməlidir. Əgər danışıqlarda fəallaşma olmasa, növbəti ildə yay aylarında təmas xəttində toqquşmaların intensivliyi arta, müharibə təhlükəsi yarana bilər”.