Amerika Birləşmiş Ştatlarının Prezidenti Donald Tramp ölkənin Səhiyyə naziri Tomas Praysı vəzifəsindən azad edib.

Yenixeber.org: Bu barədə Ağ Evin yaydığı açıqlamada deyilir. Məlumata görə,Tramp Səhiyyə naziri olan Tomas Praysın istefa ərizəsini qəbul edib.

Jurnalistlərlə görüşü zamanı Donald Tramp yaranan vəziyyəti biabırçılıq adlandırıb: “Belə hadisə mənim xoşuma gəlmir. Fikrimcə, bu, biabırçılıqdır. Çünki Tomas Prays insan kimi çox yaxşı adamdır. Səlahiyyətli şəxslər büdcənin hesabına şəxsi məqsədlər üçün təyyarədən istifadə problemi ilə məşğul olacaqlar”.

“Politika”nın məlumatına görə, nazir Amerika ərazisində 26 dəfə çarter reysindən istifadə edib. Nazirin doğmalarını və ya dostlarını ziyarət etmək üçün xidməti reyslərdən bəhrələndiyi müəyyənləşib. Bu uçuşlar dövlətə 300 min dollara başa gəlib. Araşdırma nəticəsində məlum olub ki, nazirin bir neçə uçuşu beynəlxalq reyslərdir. Bunun da nəticəsində büdcə xərcləri 1 milyon dollara çatıb.

Qeyd edək ki, 62 yaşlı Prays Tramp komandasından qovulan ilk nazirdir.