"xeberinfo.com":Ölkə o zaman inkişafa doğru irəliləyir ki, ona güclü siyasi lider rəhbərlik edir. Bu gün böyük fəxr və qürur hissi ilə qeyd etdiyimiz «Müstəqil, müasir Azərbaycan ulu öndər Heydər Əliyevin şah əsəridir» fikri də məhz bu amilə əsaslanır. Azərbaycanın keçdiyi inkişaf yoluna nəzər saldıqda dahi şəxsiyyət Heydər Əliyevin Azərbaycan dövləti, xalqı qarşısındakı xidmətləri daha aydın görünür.

Bu fikirlər Ulu öndər Heydər Əliyevin 91 illik yubileyi münasibəti ilə Horadiz şəhərində Heydər Parkında keçirilən ümumrayon tədbirində bildirilmişdir.

Rayonun idarə, müəssisə, icra nümayəndəliklərinin, bələdiyyələrin və ictimaiyyət nümayəndələrinin, ümumilikdə 2000 nəfərin iştirak etdiyi təbirdən öncə rayon İcra Hakimiyyətinin başçısı Alı Alıyev və iştirakçılar Ulu öndərin abidəsini ziyarət etmiş, önünə gül-çiçək dəstələri qoyaraq ehtiramlarını bildirmişlər.

Sonra tədbir iştirakçıları parkda düzəldilmiş gül kompozisiyaları, ulu öndərə həsr olunan kitab sərgisi və əl işləri ilə tanış olmuşlar.

Tədbirdə çıxış edən Füzuli rayon İcra Hakimiyyətinin başçısı Alı Alıyev Azərbaycanın memarı və qurucusu Heydər Əliyevin xalqımız qarşısında misilsiz xidmətlərindən danışmışdır. Bildirmişdir ki, Ulu öndər Heydər Əliyevin doğum gününün Füzulidə keçirilməsi artıq bir ənənəyə çevrilib. Mövzu və kompozisiya baxımından ildən-ilə zənginləşən bu gün hər bir füzulilinin qəlbində xoş ovqat yaradır, xalqının bu günü naminə həyatını sərf etmiş dahi şəxsiyyətin ruhuna minnətdarlıq hissi oyadır.

Ulu öndər Heydər Əliyevin yubileyi ərəfəsində füzulili məcburi köçkünlər də ölkə başçısı cənab İlham Əliyevi əmin etmək istəyir ki, müstəqil Azərbaycanın əbədi və dönməzliyi yolunda Ulu öndərin vəsiyyətlərinin yerinə yetirilməsinə bütün xalqımız kimi füzulilər də yorulmadan, var qüvvələri ilə çalışacaq, Heydər Əliyevin ölməz əməllərini nəsildən-nəsilə keçirəcəklər.

Ümummilli lider Heydər Əliyevin anadan olmasının 91 illiyi ərəfəsində Füzuli rayonu ərazisində iməciliklər keçirilmiş, çoxlu sayda ağac əkilmiş, küçə və meydanlarda, parklarda abadlıq, səliqə-sahman işləri görülmüşdür.

Yubiley tədbiri rayonun mədəniyyət və incəsənət ustalarının ifasında konsert proqramı ilə davam etdirilmişdir.

Qeyd edək ki, Ulu öndər Heydər Əliyevin anadan olmasının 91 illiyi rayonun bütün idarə və müəssisələrində silsilə tədbirlər davam edir.