Bu gün Bakı Apellyasiya Məhkəməsində “JAM.az” saytının baş redaktoru Fikrət Fərəməzoğlu barəsində həbs qətimkan tədbirinin seçilməsindən verilən apellyasiya şikayəti üzrə keçirilməli olan məhkəmə prosesi təxirə salınıb.
Xeberinfo.com:   Bu barədə vəkil N.Kərimli məlumat verib.
Vəkilin sözlərinə görə, F.Fərəməzoğlu apellyasiya şikayətindən imtina edib: “Məhkəmə prosesindən öncə hakim Həsən Əhmədovun katibi mənə zəng vuraraq iclasın təxirə salındığını bildiridi. O, Fikrət Fərəməzoğlunun apellyasiya şikayətindən imtina etdiyini dedi”.
Xatırladaq ki, daha əvvəl F.Fərəməzoğlu vəkili N.Kərimlidən də imtina edib.
Qeyd edək ki, Daxili İşlər Naizrliyinin yaydığı məlumata görə, görə, Xətai rayonunda yerləşən restoranlardan birinin sahibi olan paytaxt sakini DİN-ə müraciət edərək İbişbəyli Fikrət Fəraməz oğlunun rəhbəri olduğu “JAM.az” və digər saytlarda obyektinin işgüzar nüfuzuna xələl gətirən materiallar yaydığını, həmin yazıları saytdan çıxarmaq müqabilində bu ilin aprel ayında ondan 1000 manat aldığını və gələcəkdə bu səpkili materialların yazılmaması üçün hər ay 5000 manat tələb etdiyini bildirib: “Aparılan araşdırmalarla müraciətdə göstərilən xüsusatlar öz təsdiqini tapıb və həyata keçirilmiş əməliyyat tədbirləri ilə Fikrət İbişbəyli iyunun 30-da həmin şəxsdən eyni üsulla 3000 manat alarkən saxlanılıb”. Faktla bağlı Cinayət Məcəlləsinin 182-ci maddəsi ilə (hədə-qorxu ilə tələb etmə) cinayət işi başlanılaraq F.İbişbəyli barəsində həbs-qətimkan tədbiri seçilib. İlkin istintaqla Fikrət İbişbəylinin ətrafına bir qrup şəxs toplayaraq çoxsaylı sahibkar və vəzifəli şəxslərin barələrində rüsvayedici məlumatlar yaymaq hədəsi ilə onlardan külli miqdarda pul alması müəyyən olunub. Araşdırmalar zamanı adları istintaqa məlum olan ayrı-ayrı vətəndaşlar da Fikrət İbişbəylinin onlara qarşı anoloji cinayətlər törətdiyi barədə müraciətlər ediblər. Hazırda faktla bağlı zəruri istintaq-əməliyyat tədbirləri davam etdirilir.