Telekanalın reklamdan əldə etdiyi milyonlar hara sərf olunur?

"Xeberinfo.com":   Tanınmış telejurnalist Etibar Babayevə yeni vəzifə verilib. Lent.az-ın məlumatına görə, o, “Azad Azərbaycan” telekanalında yeni yaradılmış Bədii Şuraya sədr təyin edilib. Etibar Babayev bununla yanaşı, telekanalın vitse-prezidenti səlahiyyətlərini də həyata keçirəcək. Məlumat ATV-dən təsdiqlənib.  
Qeyd edək ki, Etibar Babayevin sonuncu vəzifəsi AzTV-nin nəzdində Televiziya və Radio Akademiyasının rektoru idi. O, bu vəzifədən öz ərizəsi ilə getmişdi.
Bu arada “Unikal” qəzeti ATV ilə bağlı ilginc faktlar dərc edib. Qəzet yazır ki, yerli telekanallar arasında ən çox reklam əldə ATV-dir. Məlumatlara görə, ATV reklamlardan ay ərzində təxminən 2 milyon manat həcmində gəlir götürür. Bu məbləğin illik toplamı isə 24 milyon manat deməkdir ki, bunun da yalnız çox cüzi bir hissəsi yaradıcı kollektivin əmək haqqına və texniki xərclərə sərf olunur. “Belə olan halda, ATV prezidenti Vüqar Qaradağlının cavablandırması gərəkən bir sual ortaya çıxır: Bəs, yerdə qalan milyonlarla manatın aqibəti necə olur? Axı, fakt ondan ibarətdir ki, ATV özəl layihələrə pul ayırmır, işçilərinin maaşı digər telekanallardakı əmək haqlarından heç nə ilə fərqlənmir və s. Hesab edirik ki, evimizə vulqar ifadələr və küçə söyüşləri daşıyan ATV-nin maliyyə durumu ilə bağlı da ciddi araşdırmalara ehtiyac var”,- deyə qəzet yazır.