Bakının bəzi yollarında xüsusilə axşam və səhər saatlarında böyük sıxlıq yaşanır. Bunun qarşısını almaq üçün bir sıra layihələr həyata keçiriləcək. Bəzi prospektlərin genişləndirilməsi gözlənilir. Onlardan biri də Babək prospektidir

Yenixeber.org: Paytaxtda tıxacların qarşısını almaq üçün önəmli layihələr həyata keçiriləcək. İlk növbədə bəzi prospektlərdə genişləndirmə işləri aparılacaq.

Layihə çərçivəsində Heydər Əliyev prospektindəki stadionun yanından Babək prospektinə 4 hərəkət zolaqlı çıxış veriləcək. Bununla da Heydər Əliyev prospekti ilə Babək prospekti arasında geniş əlaqə yaranacaq.

Bakı yolları ilə bağlı 2018-ci il planında Nobel prospektinin də təmir edilməsi məsələləri öz əksini tapıb. Bütün bu işlər həllini tapandan sonra paytaxtın tıxac yükü çox olan prospektlərində vəziyyət stabilləşəcək.

Qeyd edək ki, daha əvvəl Heydər məscidi, "3-cü mikrorayon" dairəsi, metronun "20 yanvar" stansiyasının ətrafında olan yol qovşaqları ilə bağlı da Nazirlər Kabinetinə təkliflər göndərilib. Xüsusilə "20 yanvar" dairəsi və Bakı-Sumqayıt yolundakı tıxacı azaltmaq üçün metrobus xəttinin çəkilməsi planlaşdırılır.