Belarusun paytaxtı Minskdə qısamüddətli səfərdə olan ABŞ dövlət katibi Mayk Pompeo bu ölkəni neftlə təmin etməyə hazır olduqlarını bəyan edib. Virtualaz.org xəbər verir ki, bu bəyanat Rusiyanın Belarusu sıxışdırmaqda olduğu bir vaxtda səslənib.

Yenixeber.org: Belarus Rusiyanın “daha dərin inteqrasiya” tələblərinə, yaxud faktiki olaraq Rusiyaya birləşməyə yox deyərək Moskvaya qarşı son vaxtlar demarş edir və öz suverenliyini qoruyacağını bildirir. Bu çərçivədə Belarus Rusiya neftindən asılılığı azaltmağa çalışır və Azərbaycan da daxil olmaqla bir sıra ölkələrə müraciət edərək neft almaq istədiyini bildirib.

Mayk Pompeo Belarusa səfər edən ilk ABŞ dövlət katibidir. O, prezident Aleksandr Lukaşenko ilə danışıqlardan sonra  bəyan edib ki, ABŞ Belarusu neftlə “100 faiz təmin etməyə” hazırdır.

“Bizim enerji resursları istehsalçılarımızı sizi neftlə 100 faiz təmin etməyə hazırdır, rəqabətli qiymətlərlə”,-Pompeo bildirib. Lakin ABŞ dövlət katibi dərhal əlavə edib ki, Amerika müəssisələrinin Belarus bazarına daxil olmasını asanlaşdırmaq üçün bəzi məsələlər həll edilməlidir. Bura Belarusun Ümumdünya Ticarət Təşkilatına daxil olması və özəl sektorun daha fəal inkişafı da daxildir.

Pompeo Minskdə keçirdiyi brifinqdə ABŞ-la Belarus arasında təhlükəsizlik sahəsində də uğurlu əməkdaşlıq olduğunu vurğulayıb. O əlavə edib ki, ABŞ dövlət katibi statusunda Belarusa səfər çoxdan baş verməliydi. “Biz tarixi yada salmalıyıq. ABŞ 1991-ci ildə Belarusun müstəqilliyini ilk tanıyan ölkələrdən olub. Biz bu mövqeyi indi də dəstəkləyirik və daha dərin əməkdaşlığa ümid edirik”,-o bildirib.

ABŞ dövlət katibi əlavə edib ki, onun ölkəsi Belarusa “suveren dövlət kimi formalaşmaqda” kömək etməyə hazırdır. Ona görə də neft təchizatı ilə bağlı kömək göstərmək niyyətindədir. “Biz dünyada ən iri neft istehsalçısıyıq və sizə nə lazımsa bizə müraciət edin, deyin”,-Pompeo bəyan edib.(virtualaz)