Avropa Parlamentinin Xarici Əlaqələr Komitəsi Ukrayna, Gürcüstan və Moldovanın avrointeqrasiyasını dərinləşdirmək üçün “Şərq Tərəfdaşlığı+” modelinin tətbiq edilməsini tələb edib.

Yenixeber.org: Bu barədə informasiyanı komitənin mətbuat xidməti yayıb. Bu modelin Şərq Tərəfdaşlığı ölkələrinin 24 noyabrda Brüsseldə keçirilən sammitində qəbul edilməsi təklif olunub. “Şərq Tərəfdaşlığı+” modelinin tətbiq olunacağı ölkələrdə rouminq üçün tariflərin ləğv edilməsi, onların gömrük, energetika ittifaqlarına cəlb olunması, eləcə də Şengen zonasına qatılması nəzərdə tutulub. Komitə həmçinin Gürcüstan, Ukrayna və Moldovanın sosial-iqtisadi infrastrukturuna dövlət və şəxsi investisiyaların cəlb edilməsi üçün fond yaradılmasını da məsləhət görüb.

Xarici Əlaqələr Komitəsi tərəfindən təklif edilən qətnamə layihəsinin lehinə 40 deputat, əleyhinə isə 6 deputat səs verib. Layihənin noyabrda Avropa Parlamentinin səsverməsinə çıxarılması nəzərdə tutulub.

Qeyd edək ki, Şərq Tərəfdaşlığı layihəsinə Ukrayna, Moldova, Gürcüstan, Azərbaycan, Ermənistan və Belarus üzvdür.(axar)