"Xeberinfo.com": ABŞ-ın “Stratfor” Beynəlxalq Araşdırmalar Mərkəzi Putinin yürütdüyü siyasətin onu məhvə doğru apardığını yazıb.

Mərkəzin ekspertlərinin iddiasına görə, vaxtilə Kosova problemi gündəmə gələndə keçmiş prezident Boris Yeltsinin hakimiyyətinin sonu olacağı proqnozlaşdırıldı və bu baş verdi. Eyni taleyi Putin də yaşaya bilər. Belə ki, Kosova böhranı ərzində rus siyasətçiləri Serbiyada NATO müdaxiləsinə meydan oxumağa başladı, nəticədə isə Boris Yeltsinin özü təcrid olundu və hakimiyyətdən getdi.

Ukrayna böhranı, Putinin Ukrayna müdaxiləsi müəyyən mənada Yeltsinin Kosova məsələsində yürütdüyü siyasətə bənzəyir. Bu baxımdan hesab etmək olar ki, Putin Yeltsinin taleyini yaşayacaq.

Ukrayna ordusu hücuma keçdi: separatçılar panikada

Ukrayna Silahlı Qüvvələri və Milli Qvardiyası ölkənin şərqində separatçıların əlində olan Luqansk və Donetsk şəhərlərinə doğru bir neçə istiqamətdən hücuma başlayıb. APA-nın Ukrayna saytlarına (“112.ua”, “MİGnews.com.ua”, “Censor.net”, “Pravda.com.ua”) və hərbi ekspert Dmitri Tımçuka istinadən verdiyi məlumata görə, antiterror əməliyyatına cəlb olunmuş qüvvələr Luqansk vilayətinin Rubejnoye şəhərinin bütün perimetrini nəzarətə götürərək şəhəri separatçılardan təmizləməyə başlayıb. Vilayətin Lisiçansk şəhəri də mühasirəyə alınıb.

 Ukrayna daxili işlər nazirinin müşaviri Zoryan Şkiryak özünün “Facebook” səhifəsində ordunun Luqansk vilayətinin Severodonetsk şəhərinə daxil olduğunu və Lisiçansk şəhəri istiqamətində hərbi əməliyyatların davam etdiyini yazıb: “Rusiyalı terrorçuların ətrafında mühasirə həlqəsi daralır, hücum davam edir. Severodonetsk şəhərinə daxil olmuşuq, Lisiçansk, Rubejnoye və Popasnaya şəhərlərində düşmən sıxışdırılır, onlar vacib magistral yollardan təcrid edilib. Terrorçu dəstələrin başçıları panikadadır və bir-biriləri ilə mübahisə edirlər, bir-birini şantaja keçiblər. Onlardan bəziləri qaçmağa çalışsa da, Putin onları Rusiyaya buraxmağı qəti qadağan edib”.

Ukrayna ordusunun tankları Donetsk şəhərindən 44 km məsafədə yerləşən və “Bes” ləqəbli terrorçu İqor Bezlerin nəzarətində olan Qorlovka şəhərinə bitişik Mayorsk stansiyasına da daxil olub. Şəhərin mərkəzində atəş səsləri eşidilir. Separatçıların “Qrad” qurğularından ordu hissələrinə atəş açdığı xəbər verilir.  

Qondarma “Donetsk Xalq Respublikası”nın “baş komandanı” olan Strelkov ləqəbli Rusiya vətəndaşı İqor Girkin Donetsk istiqamətində gedən döyüşlər barədə məlumat verib. O, hazırda Avdeyevka (Donetsk şəhərindən 18 km aralı), Dzerjinsk (Donetskdən 52 km aralı), Peski (Donetskdən 15 km aralı), Karlovka (Donetskdən 30 km aralı), Debaltsevo (Donetskdən 75 km aralı), Netaylovo (Donetskdən 27 km aralı) yaşayış məntəqələrində döyüşlər getdiyini söyləyib: “Düşmən Avdeyevka qəsəbəsinə daxil olaraq oradan Donetsk şəhərinin dəmir yoluna doğru hərəkət etməyə başlayıb. Peski, Karlovka, Netaylovodakı mövqelərimiz eyni anda hücuma məruz qalıb. Düşmən 15 tankla Debaltsevoya soxulub. Dzerjinskdə Milli Qvardiya ilə döyüş gedir”. 

İ. Girkinin sözlərinə görə, Rusiyanın qəti qərar qəbul etməsinin vaxtı çatıb: “Rusiya nəhayət, qərar verməlidir ki, Donbassdakı rusları müdafiə edəcək, yoxsa onları birdəfəlik satacaq?! Qalan başqa şeylər üçün vaxt itirilib. Üç aylıq fəaliyyətsizlik düşmənin öz qüvvələrini artırmasına və döyüş qabiliyyətli ordu yaratmasına imkan verib”.

Donetsk şəhərindəki 51 saylı orta məktəbin və dəmir yolu vağzalının yaxınlığında baş verən atışma zamanı 4 dinc sakinin öldüyü bildirilir. Donetsk dəmir yolu vağzalındakı “Amstor” ticarət mərkəzi ətrafında mərmi partlayışı nəticəsində də ölənlər olduğu xəbər verilir.

Saakaşvilidən Avropaya çağrış: “Rusiya neftindən imtina edin”

Gürcüstanın keçmiş prezidenti Mixail Saakaşvili Sürixə səfəri zamanı “Rustavi 2” televiziya kanalına müsahibəsində Avropanın Rusiyaya qarşı tətbiq edəcəyi sanksiyalardan danışıb. Modern.az xarici mətbuata istinadən xəbər verir ki, Saakaşvili Avropanın nə edə biləcəyi ilə bağlı bunları deyib: “Avropa Rusiyanın Avropa İttifaqını neftlə təmin edən Rusiyanın “Dostluq” neft kəmərindən neft almağı dayandırmalıdır. Əgər Rusiya bu kəmərdən gələn gəlirdən məhrum olarsa, işləri çox pis gedəcək”.

Latviya məşhur rus müğənnilərinə qadağa qoydu

Latviyanın xarici işlər naziri Edgar Rinkeviç ölkəyə girməsi qadağan edilmiş şəxslərin siyahısını genişləndirib. "Qara siyahı"ya Oleq Qazmanov, İosif Kobzon (həm də Rusiya Dumasının üzvüdür) və Valeriya da salınıb. Özü də "Novaya volna" mahnı müsabiqəsinə 1 gün qalmış.   Rinkevich 2 gün qabaq öz Twitter hesabında yazmışdı ki, "imperializm və təcavüzü dəstəkləyən" musiqiçilərin Latviyaya gəlməsinə imkan verməyəcək.  Xarici İşlər Nazirliyi sözügedən şəxslərin Ukraynanın ərazi bütövlüyünə qarşı yönələn aksiyalarda iştirakına bu cür cavab verib. Hər üç müğənni prezident Putinin Ukrayna siyasətini dəstəkləyən bəyanatlara imza atmışdılar.