"Xeberinfo.com": Torpaq qəhrəmanlar yetişdirir. Azərbaycanın mayasında yaşayır bu qəhrəmanlıq, şəhidlik zirvəsi. Bu torpaq üçün torpağa düşmüş insanlar şəhidliyin ən yüksək zirvəsində qalibiyyət nəğməsi ilə Milli Qəhrəman adına layiq görülərək dünyaya vida söyləmişlər. Əgər şəhid varsa, demək, vətən var. Şəhidlik Allah hökmü deyil. O, ürəyin hökmüdür, damarda axan qeyrətin əmridir. Hər kəs canından keçərərk şəhid ola bilmir. İnsan uğrunda can verdiyi həqiqətə inanmasa, məqsədinə yetişə bilməz. Bu fikirlər Horadiz şəhərində Azərbaycanın suverenliyi, torpaqlarımızın müdafiəsi uğrunda gedən döyüşlərdə qəhrəmanlıq göstərərək şəhid olmuş füzulili Milli Qəhrəmanların ailələri ilə keçirilən görüşdə bildirilmişdir.

Milli Qəhrəmanlara göstərilən diqqət və qayğının, ehtiramın  bariz   nümunəsi kimi  Horadiz  şəhərində  Qəhrəmanlar  Parkı  salınmış, Parkda  6 nəfər  Milli  Qəhrəmanın  şərəfinə  abidə  kompleksi ucaldılmışdır.

Noyabrın  28-də  havanın yağışlı  olmasına  baxmayaraq,  yüzlərlə  füzulili  Horadiz  şəhərinin   giriş  hissəsində-  Bayraq  meydanının   yaxınlığında  salınmış  Qəhrəmanlar  Parkına  toplaşmışlar.

Qəhrəmanlar parkının açılış mərasimində Füzuli rayon  İcra  Hakimiyyətinin başçısı Alı Alıyev, idarə, müəssisə və hüquq-mühafizə orqanlarının rəhbərləri, Milli  Qəhrəmanların  ailə  üzvləri, rayon  ictimaiyyətinin  nümayəndələri  abidə önünə  gül-çiçək   dəstələri  qoymuş, şəhidlərin  xatirəsini  bir  dəqiqəlik  sükutla   yad  etmişlər.

Sonra Parkın açılış mərasimi keçirilmişdir.

Rayon İcra  Hakimiyyətinin  Başçısı  Alı  Alıyev  Milli  Qəhrəmanlara  Azərbaycan  Prezidenti cənab  İlham  Əliyevin, diqqət və qayğısından danışmış, şəhidlərin torpaqlarımızın müdafiəsi yollundakı  şərəfli  xidmətlərinin heç zaman yaddan çıxmayacağını  bildirmişdir.

Tədbir  əsas hissəsi Heydər   Əliyev  Mərkəzində davam  etmişdir.

Görüşü rayon  İcra  Hakimiyyətinin  Başçısı  Alı  Alıyev  açmış, 6 nəfər  Milli  Qəhrəmanın  keçdikləri  ömür  yolu  barədə  ətraflı  məlumat  verilmişdir.

Alı Alıyev qeyd etmişdir ki, Ermənistan-Azərbaycan, Dağlıq Qarabağ münaqişəsi nəticəsində rayon üzrə 1000 nəfərə yaxın füzulili  şəhid olmuş, 1340 nəfər yaralanmış və girov götüülmüşdür. Şəhidlərdən 6 nəfəri Azərbaycan Respublikasının Milli Qəhramanı adına layiq görülmüşdür. İşğal nəticəsində rayonun madii-mədəniyyət abidələri məhv edilmiş, rayona ümumilikdə 6 milyard dollara yaxın ziyan dəymişdir.

Alı Alıyev bildirmişdir ki, bu gün hər bir füzulilinin ən böyük arzusu işğal olunmuş torpaqlarımızın azad olunması və bayrağımızın Dağlıq Qarabağda dalğalanmasıdır:

“Bunun üçün hər birimiz üzərimizə düşən vəzifələri layiqincə yerinə yetirməliyik. Mən inanıram ki, o gün uzaqda deyil və biz Ali Baş Komandan, Prezident Cənab İlham Əliyevin rəhbərliyi altında torpaqlarımızı işğaldan azad edəcəyik”.

Görüşdə  Milli  Qəhrəmanların  ailə  üzvləri, Qarabağ müharibəsi iştirakçıları çıxış etmiş, şəhidlərə  hörmət  və  ehtiramlarını  bildirmişlər.

Rayon  İcra   Hakimiyyətinin  Başçısı  Alı  Alıyev tədbirə yekun vurmuş, bu cür görüşlərin gənclərin vətənpərvərlik ruhunda tərbiyyə olunmasında xüsusi rol oynadğını qeyd etmiş, ölkədə, rayonda  baş  verən  yeniliklər, ölkə  başçısının həyata  keçirdiyi  tədbirlərdən, Füzuliyə və füzulililərə göstərdiyi diqqət  və  qayğıdan bəhs etmişdir.

Milli  Qəhrəmanların ailələrinə  Rayon  İcra  Hakimiyyəti  tərəfindən  hədiyyələr  verilmişdir.

Tədbir rayonun  mədəniyyət  kollektivlərinin rəngarəng  konsert  proqramı  ilə  tamamlanmışdır.