VI Bakı Beynəlxalq Humanitar Forumu çərçivəsində “Yanlış məlumatlandırma siyasəti – müasir dünyada sabitliyə təhdid” mövzusunda işçi sessiyaya start verilib.

Yenixeber.org: Sessiyada cəmiyyətin yanlış məlumatlandırılmasının ağır fəsadları, bunun bütün dünyada sülh və sabitlik üçün yaratdığı təhlükələrlə bağlı məruzələr dinləniləcək.

Yerli və xarici kütləvi informasiya vasitələrinin, beynəlxalq və regional media qurumlarının rəhbərlərinin və nümayəndələrinin, tanınmış ekspertlərin iştirakı ilə keçiriləcək sessiya iki hissədən ibarətdir.

Sessiyanın Azərtac-ın İdarə Heyətinin sədri, Dünya Xəbər Agentlikləri Konqresinin və OANA-nın prezidenti Aslan Aslanovun və Rusiyanın TASS agentliyinin Baş direktorunun birinci müavini, Dünya Xəbər Agentlikləri Konqresi Şurasının vitse-prezidenti Mixail Qusmanın moderatorluğu ilə keçən birinci hissəsində Rusiya Dövlət Dumasının deputatı Dmitri Savelyev, Rumıniyanın Agerpress agentliyinin baş direktoru, Avropa Xəbər Agentlikləri Alyansının baş katibi Aleksandru Giboi, Estoniya parlamentinin vitse-spikeri Kalle Laanet, İranın İRNA xəbər agentliyinin baş direktoru Sayed Ziya Haşemi, ADA Universitetinin müəllimi Şəfəq Mehrəliyeva, “Belarus seqodnya” media holdinqin baş direktoru Dmitri Juk və “Hoy Los-Angeles” qəzetinin baş redaktoru Alexandro Masielin çıxışı nəzərdə tutulub.

Mixail Qusman çıxışında "feyk nyus"un ildən-ilə zəifləməyən böyük sosial təhlükə olduğunu bildirib. Onun sözlərinə görə, yalan informasiya problemi jurnalistika üçün gündən-günə daha da aktuallaşır.

Mixail Qusmanın fikrincə, dünya mediası informasiya hücumuna hazır olmalıdır.

Vitse-prezident hesab edir ki, problemlə mübarizə hələ erkən mərhələdədir və "feyk nyus"u dayandıracaq qırmızı düymə tapılmalıdır. "Yanlış informasiyalarla bağlı məsələ bir neçə il bundan öncə belə aktual sayılmırdı. Bu gün ekspertlər tərəfindən də yalan informasiyalarla bağlı fərqli fikirlər söylənilir. Artıq yalan informasiya yayımı adi hala çevrilib. Bu bu proses nəinki səngiyir, hətta günü gündən güclənir. Yanlış məlumatlandırma müharibəsi hansısa iki ölkə arasında aparılmır. Biz hamımız bilərəkdən və ya bilməyərəkdən bu müharibəyə qoşulmuşuq. Bu vəziyyət hansısa ölkəni, regionu əhatə etmir. Bu problem dünyada problemə çevrilib. Hazırda biz bunun qarşısını ala bilmərik. Amma ən azından buna dair nə edəcəyimizi planlaşdıra bilərik", - deyə Mixail Qusman qeyd edib.