Naxçıvan  Dövlət  Universitetində  ənənəvi Novruz bayramı tədbirlərinin yekunu olaraq ümum universitet Novruz şənliyi keçirilib. Çoxsaylı müəllim və tələbələrin dövrə vurduğu bayram tonqalı yandırılıb, bayram adətilə tonqaldan atlanıblar.     

         Tədbir bayram konserti ilə davam edib. Əvvəlcə rektor, professor Saleh Məhərrəmov çıxış edərək kollektivi əziz bayram münasibətilə təbrik edib. Qeyd olunub ki, çoxəsrlik tarixə malik, xalqımızın günümüzə qədər yaşatdığı, qoruyub gələcək nəsillərə ötürdüyü, müqəddəsləşdirdiyi Novruz  bayramı özündə həyatı, yaranış və dirçəlişi, milli birliyi, təbiətin füsunkar gözəlliklərini, gələcəyə, xoşbəxtliyə, bolluğa ümidini əks etdirir. Novruz bayramının mənşəyi, astroloji mənası, bütün türk xalqlarının ümumi bayramı olması ilə bağlı ətraflı məlumat verən rektor bildirib ki, sovet imperiyası zamanı qadağan olunmuş bu bayram xalqın yaddaşında qorunub saxlanılmış, müstəqillik qazanıldıqdan sonra ümummilli lider Heydər Əliyevin rəhbərliyi ilə dövlət səviyyəsində qeyd olunmağa başlanmışdır. Novruz bayramı 2009-cu il sentyabrın 30-da YUNESKO-nun qeyri-maddi mədəni irs siyahısına daxil edilmiş, 23 fevral 2010-cu ildə isə BMT Baş Assambleyasının 64-cü sessiyasının iclasında mart ayının 21-i "Beynəlxalq  Novruz  Günü" elan edilmişdir. Naxçıvan Muxtar Respublikasında bu milli bayram xüsusi təntənə ilə, milli tətbiqi sənəti və xalq yaradıcılığını inkişaf etdirməklə paralel qeyd olunmaqdadır.                

Bayram konsertində Novruz adət-ənənələri, musiqi nömrələri, universitetin gürcü, türk tələbələrinin də qoşulduğu yallılar tamaşaçılara yüksək əhval ruhiyyə bəxş edib.

Mina Qasımova

NDU-nun Mətbuat şöbəsinin əməkdaşı