Vasif İmanovla bağlı ilkin razılığın əldə olunduğu da bildirilir

Yenixeber.org: Ayyarımdır ki, boş qalan Yasamal Rayon İcra hakimiyyətinin başçısı postuna mediada müxtəlif namizədlərin adları hallanmaqdadır: Daşkəsən Rayon İcra Hakimiyyətinin başçısı Əhəd Abıyevin, YAP Yasamal Rayon Təşkilatının sədri Tağı Əhmədovun və s. Adları hallanan namizədlər hər biri bu xəbəri ya birbaşa, ya da dolayısı ilə təkzib etdi.

Bugün isə yenixeber.org-a Yasamal Rayon İcra hakimiyyətinin başçısı postuna daha bir iddialı ilə bağlı məlumat daxil olub. Hakim dairədən əldə etdiyimiz məlumata görə növbəti namizəd Pirallahı Rayon İcra Hakimiyyətinin başçısı Vasif İmanovdur. Artıq bu istiqamətdə ilkin razılığın əldə olunduğu da məlumatlar sırasındadır...

Xatırladaq ki, Vasif İmanov 2003-2006-cı illərdə Heydər Əliyev adına Bakı Dərin Özüllər Zavodunda direktor müavini, 2006-2013-cü ilin mart ayına qədər ARDNŞ-nin Sosial İnkişaf İdarəsində rəis müavini vəzifəsində çalışmışdır.

Azərbaycan Respublikası Prezidentinin 7 mart 2013-cü il tarixli Sərəncamı ilə Bakı şəhər Pirallahı Rayon İcra Hakimiyyətinin başçısı vəzifəsinə təyin olunub. Mediada onun Rövnəq Abdullayevin kadrı olması ilə bağlı iddialar da yer alır.

İnformasiya şöbəsi.