İsrailin bazar tənzimləyicisi ISA bitkoinin qiymətində dəyişiklik səbəbindən bütün kriptovalyuta şirkətlərinin fond bazarında əməliyyat aparmasını qadağan etməyə hazırlaşır. Bildirilir ki, bitkoinin qiymətindəki dalğalanma maliyyə şarı təəssüratı yaradır. Belə  qeyri-müəyyənlikdə investorların əməliyyat aparması arzuolunan deyil

Yenixeber.org: Xatırladaq ki, bu ay 20.000 dollara yüksələn bitkoin ötən həftənin cümə günü 12 min dollara qədər ucuzlaşıb. Bitkoin 40 faizə qədər dəyərdən düşüb. 

Bu arada, bitkoinin  qlobal kriptovalyuta bazarında bazar payı getdikcə azalır. 2016-cı ilin dekabr ayının 27-də kriptovalyutanın bazar payı 87,94% təşkil edirdisə, bu gün həmin göstərici 44,11%-ə bərabərdir. 

İqtisadçı-ekspert Qubad İbadoğlu Oxu.Az-a açıqlamasında bildirdi ki,  2009-cu ildə qlobal maliyyə böhranının nəticəsi olaraq 1 ABŞ sent nominal dəyəri ilə tədavülə çıxan bitkoin 1 ay sonra 1 dollara, 2 il sonra 10 dollara, hazırda isə 14,97 min dollara satılır. Eləcə də, tədiyyə vasitəsi kimi bəzi hesablaşmalarda istifadə olunur:

“Son dəyərləndirmələrə görə, ümumi bazar dəyəri 260 milyard dollar təşkil edən bitkoinin taleyi çox adamı düşündürməyə və narahat etməyə başlayıb. Fikrimcə, bu valyutanın dəyəri virtual bazarda spekulyativ tələb və təkliflə bağlıdır. Real bazar dəyəri formalaşanadək ziqzaqvari dəyişikliklər gözləniləndir. Amma, bitkoinin bazar dəyərinin sürətlə, davamlı artması mümkün deyil”. 

Q.İbadoğlu bildirdi ki, bitkoinin taleyi bazar payı yüksək olan şirkətlərin bu valyuta ilə hesablaşmalara keçidindən, onu aparıcı ölkələrin Mərkəzi Banklarının tanımasından və tədavülə buraxmasından asılı olacaq:

“Odur ki, bitkoinə sərmayə qoyanlar indiki şərtlərlə qumar oynamaq qədər riskə gedirlər. Çünki hələ özünü valyuta bazarında tam təsdiq etməyən, hesablaşmalar üçün yüksək komission haqları və tələb olunan əlavə vaxta görə klassik valyuta vahidlərindən geri qalan bitkoinlə böyük pullarla “oynamaq” təhlükəlidir”.