Azərbaycan hökuməti Azərbaycan Beynəlxalq Bankının (ABB) aktivlərinin azaldılması üzərində işləyir.

Xeberinfo.com:  Bunu jurnalistlərə Maliyyə Bazarlarına Nəzarət Palatasının (MBNP) Direktorlar Şurasının sədri Rüfət Aslanlı deyib.

Bildirib ki, Palata hökumətlə bankın sağlamlaşdırılması çərçivəsində sıx əlaqədədir: “Hazırda onun kiçildilməsi prosesi gedir, belə ki, Beynəlxalq Bankın aktivləri tədricən bazarın digər iştirakçılarına verilir. 2017-ci ildə müvafiq işlər davam etdiriləcək və mən əminəm ki, bankın sağlamlaşdırılması prosesi gələn il başa çatacaq”.
R.Aslanlı əlavə edib ki, MBNP gələcəkdə bazarda yalnız özəl bankların qalmasında maraqlıdır.
“Beynəlxalq Bankın özəlləşməyə hazırlanması üçün idarəolunan səviyyəyə çatdırılması qarşımızda qoyulan ən böyük hədəfdir. Hazırda bank müəyyən aktiv və öhdəliklərini ardıcıl olaraq digər banlara ötürür. Bankın kapitalı daha dayanıqlı həddə çatdırılmalı, aktivlərinin keyfiyyəti yüksəlməlidir”.
R.Aslanlı bildirib ki, ABB-nin 2017-ci il üzrə strategiyası bu yaxınlarda Palataya təqdim olunub.
“Ən əsası, bankın dayanıqlı gəlirlə generasiya etməsi üçün proqramımız var”.