İstanbul 23-cü Ağır Cinayət Məhkəməsində davam edən və Arif Ərdəm, İsmayıl Dəmiriz, Uğur Tütünəkər kimi Türkiyənin tanınmış futbolçuların mühakimə olunduğu məhkəmə “Başakşəhər”in ulduzu Əmrə Belözoğlu və “Qalatasaray”ın baş məşqçisi Fatih Terim arasındakı FETÖ müzakirəsini ortaya çıxarıb.

Yenixeber.org: Bununla bağlı FETÖ-nun 2000-ci ilin əvvəllərinə qədər “futbol imamı” kimi tanınan Süleyman Sait Aksoy məhkəmədə ifadə verib.

Aksoyun sözlərinə görə, həmin dövrdə “Qalatasaray”ın sükanı arxasında olan Fatih Terim futboldakı Gülən qruplaşmasına qarşı olub, hətta Əmrə Belözoğluna “Fətullahçılarla münasibətini bitir” deyərək sərt şəkildə xəbərdarlıq da edib.

“Qalatasaray”ın UEFA kubokunu qazanan heyətindəki bəzi simalar “Gülən camaatı”na bağlı idi. Bunlara həmişə xüsusi diqqət ayrılırdı. Əksər hallarda sübh namazında bir yerə toplanır, daha sonra futbolçuların evlərinə gedərək dini söhbətlər edərdik. Əmrənin o vaxtlar yaşı az olsa da, adı çox tez-tez hallanırdı. O vaxt belə bir hadisə olmuşdu. Fatih Terim bir neçə dəfə onu otağına çağırıb sərt bir şəkildə “Fətullahçılarla əlaqəni kəs. Bunlar sənin karyeranı bitirər, gələcəyini qaraldar. Mən komandamda belə bir qruplaşma olmasına əsla icazə vermərəm” deyərək xəbərdarlıq edib. Bunu mənə futbolçular danışmışdı”, - Aksoy məhkəmədə deyib.