Nardaranda həbs olunanlar 16 maddə ilə ittiham olunur; Gəncədə də həbslər həyata keçirilib

Xeberinfo.com:   Hüquq-mühafizə orqanlarının noyabrın 26-da Nardaranda keçirdiyi əməliyyat zamanı öldürülən bütün şəxslərin adları məlum olub. Virtualaz.org-un hüquq-mühafizə orqanlarındakı mənbələrə istinadla yaydığı xəbərə görə, həlak olan polis əməkdaşları Vüqar Əyyub oğlu Nəsibov və Ismayıl Rəsul oğlu Tağıyevdir. Öldürülən sakinlər isə bunlardır: Babayev Əkbər Nazim oğlu, Səfərov Sarvan Şirvan oğlu, Bünyadov Rəfail Zeynalabdin oğlu və Abbas Hüseyn. Abbas Hüseyn xəstəxanada keçinib.

“Nardaran camaatını təxribata çəkmək istəyirlər”

Nardaran camaatı hüquq-mühafizə orqanları ilə danışığa hazırdır. Bu barədə APA-ya Nardaran Ağsaqqallar Şurasının sədri Məşədi Natiq Kərimov bildirib. Onun sözlərinə görə, kənd camaatı yaranmış vəziyyətlə əlaqədar hüquq-mühafizə orqanları ilə danışıqlar aparmağa hazırlaşır: “Biz qərara gəldik ki, polis və prokurorluq əməkdaşları ilə görüşüb yaranmış vəziyyəti müzakirə edək. Yaxın saatlarda görüş baş tutacaq. Biz bir daha bəyan edirik ki, Nardaran camaatını təxribata çəkmək istəyirlər. Biz bu məsələnin şişirdilməsinin əleyhinəyik. Nardaran camaatı heç vaxt dövlətə qarşı çıxmayıb, çıxmayacaq”.

Prokurorluq nardaranlıların danışıq təklifini rədd etdi

Baş Prokurorluq isə Məşədi Natiq Kərimovun danışıqlar təklifinə rədd cavabı verib.

Baş Prokurorluğun mətbuat xidmətinin rəhbəri Eldar Sultanov APA-ya açıqlamasında bildirib ki, Nardaran qəsəbəsində baş vermiş ölümlə nəticələnən silahlı insidentlə bağlı Baş Prokurorluqda cinayət işi başlanıb: “Baş Prokurorluq olaraq silahlı ekstremist cinayətkar dəstə ilə hər hansı bir danışıqlar aparmaq niyyətində deyilik”.

Eldar Sultanov həmçinin qeyd edib ki, hazırda Baş Prokurorluğun Ağır cinayətlərə dair işlər üzrə istintaq idarəsində cinayət işi üzrə istintaq-əməliyyat qrupu yaradılmaqla qeyd edilən cinayətin bütün iştirakçılarının, həmçinin həmin silahlı cinayətkar dəstəyə köməklik etmiş şəxslərin müəyyən edilərək məsuliyyətə cəlb edilməsi istiqamətində zəruri və təxirəsalınmaz istintaq-əməliyyat tədbirləri həyata keçirilir.

Nardaranla hökumət arasında danışıqlar nəticəsiz qaldı

Baş Prokurorluq danışıqları rədd etsə də, Sabunçu rayonunun rəhbərliyi Naradaran ağsaqqalları ilə görüşüb.

Bu barədə Trend-ə kənd ağsaqqalı Hacı Tağı məlumat verib. Məlumata görə, kənd ağsaqqalları ilə rayon icra hakimiyyəti nümayəndələri arasında danışıqlar başlayıb. Görüşdə Nardaran Ağsaqqallar Şurasının sədri Məşədi Natiq Kərimov, Hacı Ilqar və başqaları da iştirak edir. Məlumata görə, sakinlərin asayişə riəyyət etmələri xahiş olunub.

Danışıqlar bitdikdən sonra Trend-ə açıqlama verən Nardaran Ağsaqqallar Şurasının sədri Məşədi Natiq Kərimovun sözlərinə görə, tərəflər arasında ümumi razılığa gəlinməyib: “Kənd ağsaqqalları hadisə nəticəsində öldürülən kənd sakinlərinin meytlərini tələb ediblər. Sabunçu Rayon Prokurorluğu isə hələlik həlak olanların meyitlərini ailələrinə təhvil verməyib. Kənd ağsaqqalları bununla bağlı Sabunçu Rayon Prokurorluğuna xəbər göndərib ki, meyitlər təhvil verilməyənə qədər kənd sakinləri heç bir danışıqlara getməyəcək”.

Axşam saatlarında məlumat yayılıb ki, ölənlərin nəşi Nardarana gətirilir. Lakin Məşədi Natiq Kərimov “Azadlıq”a bildirib ki, məlumat doğru deyil. Onun sözlərinə görə, mümkündür ki, meyitləri sabah (bu gün-red) təhvil versinlər: “Mən ölənlərin ailə üzvlərinə də demişəm ki, müraciət edib, meyitlərinizi istəyin. Meyitləri saxlamağın nə mənası var axı. Ola bilər ki, sabah (bu gün-red) təhvil versinlər”.

Taleh Bağırovun harada olması ilə bağlı məlumat yoxdur

“Taleh Bağırovun harada olması barədə hələlik məndə məlumat yoxdur”. Bunu Trend-ə T.Bağırovun vəkil Cavad Cavadov bildirib. Vəkilin sözlərinə görə, Taleh Bağırovla hələ görüşməyib və hazırda onun harada olması barədə məlumatı yoxdur.

Nardaranın işığı kəsildi, yolları bağlandı

Axşam saatlarında Nardarana giriş yasaqlanıb. Yalnız sakinlər kəndə buraxılıb. Bu barədə Meydan TV-yə hadisə yerində olan jurnalistlər məlumat verib. Məlumata görə, kəndin girişində postlar qurulub, kənd cavanları tərəfindən mühafizə olunur. Girişdən xeyli aralıda isə polislər dayanıb.

Kəndin özündə də gərginlik müşahidə olunur. Imam Hüseyn meydanında çadır qurulub, əhali ora toplaşıb. Kənd sakinlərinin sözlərinə görə, orada gecələyir, hətta namazı da çadırda qılırlar.

Prosesə uşaqlar da qoşulub. Onlar keşikçilərin tonqal qalaması üçün yol kənarlarındakı kiçik ağacları kəsir, qurumuz budaqları toplayırlar.

Nardaranda elektrik enerjisinin verilişi də dayandırılıb. Faktı “Trend”ə “Azərişıq” Açıq Səhmdar Cəmiyyətinin mətbuat katibi Tanrıverdi Mustafayev təsdiqləyib.

O, bildirib ki, elektrik enerjisinin verilişi abonentlərin borcuna görə dayandırılıb.

Tanrıverdi Mustafayev qeyd edib ki, təmsil etdiyi qurum bununla bağlı bir müddət əvvəl xəbərdarlıq edib: “Biz bir neçə gün əvvəl bütün borclu abonentlərə xəbərdarlıq etmişdik. Bir daha qeyd edirik ki, borcu olan abonentlərə elektrik enerjisinin verilişi dayandırılacaq”.

Məşədi Natiq isə “Azadlıq”a bildirib ki, indiki vəziyyətdə borcdan danışmaq heç bir vicdana sığmır: “Burada qarşıdurma olub, qan tökülüb. Bunlar da borcdan danışır. Əsassız fikirlərdir. Kəndi zülmətə döndəriblər. Göz-gözü görmür. Birdən kiminsə bağında nəsə hadisə olsa kim məsuliyyət daşıyacaq? Insanlar gərgin vəziyyətdədir. Indi istəyirlər ki, biz onların korrupsiya əməllərindən danışaq?!”

2 nəfər də Gəncədə həbs edilib

Noyabrın 26-da Nardaranda Tale Bağırzadə və tərəfdarlarına qarşı əməliyyatla yanaşı Gəncə də eyni motivlə 2 nəfər həbs edilib. Bununla bağlı DIN-in yaydığı məlumata görə, Gəncə sakinləri Sabir Əliyev və Ruzi Ismayılov şəhərin müxtəlif yerlərində Tale Bağırzadə və tərəfdarlarını müdafiə etməyə çağırarkən saxlanılıblar. Sabir Əliyev şəhərin Təbriz və Ə.Məmmədov küçələrinin kəsişməsində tutulub və üzərindən “TT” markalı tapança, 8 ədəd patron, 1 ədəd patron darağı və 3,215 qram heroin götürülüb. Ruzi Ismayılov isə evinin qarşısında tutulub. Nazirliyin bildirdiyinə görə, Ruzi Ismayılov tutularkən qumbara ilə polis mayoru Oqtay Orucovun başına xəsarət yetirərək, qumbaranı partlatmağa cəhd göstərib. Ondan 1 ədəd “F-1″, 1 ədəd ”RQD-5″ qumbaraları və 14 qram heroin götürülüb.

Nardaranda ölən polislər dəfn edildi

Nardaranda həyata keçirilən əməliyyat zamanı həlak olan polis əməkdaşları isə dünən II Fəxri xiyabanda dəfn ediliblər.

Mərasimdə daxili işlər naziri Ramil Usubov, baş prokuror Zakir Qaralov, milli təhlükəsizlik nazirinin birinci müavini Mədət Quliyev, müdafiə naziri Zakir Həsənov, Yol Polisinin rəisi Ramiz Zeynalov, baş prokurorun müavini Rüstəm Usubov, Daxili Işlər Nazirliyinin Baş Narkotiklərlə Mübarizə Idarəsinin rəisi Həzi Aslanov, Prezident Administrasiyasının Müdafiə Məsələləri şöbəsinin müdiri Məhərrəm Əliyev, Daxili Işlər Nazirliyi Baş Mühafizə Idarəsinin rəisi Yaşar Əliyev də iştirak edib.

Dəfn mərasimi saat 13.35-də başa çatıb.

Nardaranda həbs olunanlar hansı maddələrlə ilə ittiham olunur?

Noyabrın 26-da Nardaranda həyata keçirilən əməliyyat zamanı həbs olunan şəxslərə qarşı artıq rəsmi ittihamlar irəli sürülüb. “Azadlıq” qəzetinə daxil olan məlumata görə, saxlanılan şəxslər Cinayət Məcəlləsinin 16 maddəsi ilə ittiham olunur.

Maddələr bunlardır:

120.2.1 – Qəsdən adam öldürmə, bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən törədildikdə;

120.2.3. – Zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürmə;

120.2.4. – Xüsusi amansızlıqla və ya ümümi təhlükəli üsulla adam öldürmə;

120.2.7. – Iki və ya daha çox şəxsi öldürmə;

120.2.11. – Quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə;

120.2.12. – Milli, irqi, dini ədavət və ya düşmənçilik niyyəti ilə adam öldürmə;

214.2.1. – Terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə;

214.2.3. – Odlu silahdan və silah qismində istifadə olunan predmetlərdən istifadə etməklə törədildikdə;

220.2. – Kütləvi iğtişas, hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə;

228.3. – Qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə mütəşəkkil dəstə tərəfindən törədildikdə;

Maddə 233. – Ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə;

Maddə 278. – Hakimiyyəti zorla ələ keçirmə və ya onu zorla saxlama;

Maddə 279.3 – Qanunvericiliklə nəzərdə tutulmayan silahlı birləşmələri və ya qrupları yaratma, adamların həlak olmasına və ya digər ağır nəticələrə səbəb olduqda;

Maddə 281.2. – Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə;

Maddə 283.2.3. – Milli, irqi, sosial və ya dini nifrət və düşmənçiliyin salınması mütəşəkkil dəstə tərəfindən törədildikdə;

Maddə 315.2 – Hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə.

Bu maddələrin bir qisminin sanksiyasında ən ağır cəza – ömürlük azadlıqdan etmə də nəzərdə tutulur.

Nardaran sakinləri bayırda soyuq olduğu üçün çadırlarda növbə çəkir

Sakinlər daş, çınqıllardan yolu keçilməz ediblər

Nardaranın girişi hazırda bu vəziyyətdədir