Qusarda qətl hadisəsi baş verib.

"Xeberinfo.com":   Daxili İşlər Nazirliyinin verdiyi məlumata görə, oktyabrın 4-də Qusar şəhərində yaşayan Şahin Niftəliyevin evinə gəlmiş tanışı, rayon sakini Rəşad Abdulrəhimov münaqişə zəminində ona bıçaqla xəsarət yetirib, kirayədə yaşayan həmyerlisi Zibeydə Hacıbəyovanı itələyərək yıxıb və hadisə yerini tərk edib.

Ş.Niftəliyev hadisə yerində ölüb, Z.Hacıbəyova isə xəstəxanaya yerləşdirilib.

Qusar Rayon Polis Şöbəsinin əməkdaşlarının həyata keçirdikləri əməliyyat-axtarış tədbirləri nəticəsində R.Abdulrəhimov tutulub.

Masallıda da qətl hadisəsi baş verib. Hadisə ötən gün saat 23 radələrində rayonun Köhnə Alvadı kəndində qeydə alınıb.

Kənd sakini, 1980-ci il təvəllüdlü Rafael Güloğlan oğlu Qasımov şəxsi münasibətlər zəminində kiçik qardaşı, 1984-cü il təvəllüdlü Ramil Güloğlan oğlu Qasımova bıçaqla qarın boşluğundan vurub.

R.Qasımov xəstəxanaya aparılarkən qan itirmə nəticəsində yolda dünyasını dəyişib.

Meyit daxili və xarici müayinə olunmaq üçün Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyinin Masallı rayon şöbəsinə aparılıb.

Hadisəni törətmiş Rafael Qasımov yaxalanaraq istintaq orqanlarına təhvil verilib.

Hər iki faktla bağlı rayon prokurorluqlarında cinayət işi açılıb, araşdırma aparılır (APA).