Hikmət Kərimov: “Əhəd hadisədə günasızdır və onu üzərində haqqı olmayan atasına görə cəzalandırmaq doğru deyil”

Yenixeber.org: Bu gün ölkə mediasında Bakıda piyadanın ölümü ilə nəticələnən ağır yol qəzasından geniş bəhs olunmaqdadır. Mediada gedən məlumatlarda bildirilir ki, qəza Bakı sakini, 1993-cü il təvəllüdlü Kərimov Əhəd Hikmət oğlu tərəfindən törədilib.

Məlumatlarda qeyd olunurdu ki, Sabunçu dairəsi yaxınlığında – SOCAR yanacaqdoldurma məntəqəsinin qarşısında 90 SR 544 dövlət nömrə nişanlı “Mersedes Sprinter” markalı mikroavtobus sərxoş halda yolu keçməyə çalışan kişini vurub. Zərbədən piyada yolun hərəkət hissəsinin digər zolağına yıxılıb və bu zaman arxadan gələn və 24 yaşlı Əhədin sürdüyü “Porşe” onun üstündən keçib. Piyada hadisə yerindəcə keçinib. Hazırda onun şəxsiyyətinin müəyyən edilməsi istiqamətində iş aparılır.

Digər məlumatlarda isə yazılırdı ki, “Porşe”ni idarə edən 24 yaşlı Əhəd Kərimov BDYPİ-nin İstintaq şöbəsinin keçmiş rəisi, hazırda Şirvan şəhər Polis İdarəsinin Təhqiqat şöbəsinin rəisi vəzifəsində çalışan polis polkovnik-leytenantı Hikmət Kərimovun oğludur.
Realliq.info hadisənin baş vermə səbəblərini və piyadanı vuran şəxsin kimliyinə aydınlıq gətirib. Kərimovun atası, Şirvan şəhər Polis Şöbəsinin Təhqiqat bölməısinin rəisi Hikmət Əhəd oğlu Kərimovun da fikirlərini öyrənib. 

Araşdırmalar zamanı bəlli olub ki, gecə saatlarında baş verən qəzada isə onun oğlunun ittiham edilməsi həqiqəti əks etdirmir. Belə ki, dünən gecə saatlarında Sabunçu dairəsi yaxınlığında yerləşən SOCAR yanacaq doldurma məntəqəsində sərxoş halda yatan vətəndaşı SOCAR-ın mühafizə xidmətinin əməkdaşları ordan uzaqlaşdırıblar. Yolu keçməyə çalışan piyadanı SOCAR yanacaqdoldurma məntəqəsinin qarşısında "Mersedes Sprinter” markalı mikroavtobus vurub. Güclü zərbədən sonra piyada yolun digər zolağı ilə hərəkət edən “Porşe” markalı avtomobilə dəyib. Qəza nəticəsində vətəndaş dünyasını dəyişib.

Hadisənin günahkarı olmayan “Porşe” markalı avtomobilin sürücüsü Kərimov Əhədin baş verən qəza ilə bağlı ittiham edilməsi medianın da gündəmini zəbt edib. Məsələnin ictimai marağını nəzərə alaraq polis polkovnik-leytenantı Hikmət Kərimovun da fikirlərini öyrənə bildik. Realliq.info – ya açıqlama verən sabiq rəis qeyd etdi ki, hadisədə oğlunun heç bir günahı yoxdur; “Çoxları məni yaxşı tanıyır. Mən 1992 –ci ildə institutda əyani təhsil almağıma baxmayaraq könüllü olaraq Qarabağda gedən döyüşlərdə iştirak etmişəm və yaralanmışam. Hələ də həmin yaraların əziyyətini çəkirəm. Mediada gedən məlumatlar reallıqdan kənardır. Kərimov Əhəd mənim oğlumdur. Lakin, Əhədin anası ilə mən 1994 – cü ildə rəsmən ayrılmışam.Biz ayrılandan sonra ikimiz də ailə qurmuşuq. Mənim də, onun da növbəti ailədən uşaqlarımız olub. O zaman o, Əhədi də götürərək qurduğu ailəsi ilə birgə xaricə getdi. Üç ildir ki, o, oğlumla birgə bura qayıdıb. Mənim bu uşağın üzərində haqqım olmayıb. Amma bəziləri indi mənə görə ona mənəvi sarsıntılar yaşatdırırlar. Axı, onun günahı olmadığı halda necə demək olar ki, məmur oğlu adam öldürdü. Mən bu uşağa baxmamışam. O, körpəykən alınıb məndən və mənimlə yaşamayıb. Indi oğlumu törətmədiyi əmələ görə, atası polis əməkdaşı olduğu üçün cəzalandırmaq nə qədər ədalətlidir"? 

Daha sionra keçmiş həyat yoldaşından danışan Hikmət Kərimov bildirdi ki, onların boşanmasına 1994 - cü ildə Yasamal rayon məhkəməsində baxılıb. Həmin məhkəmənin qərarından sonra Kərimov Əhədin anası uşağın onunla görüşünə icazə verməyib. Məhz bu səbəbdən o uşağını görməyib; “Rayon məhkəməsinin qərarından sonra daha 12 instansiya məhkəməmiz olub. Və anası uşağı məndən aldı. Bizim münasibətlərimiz xoş olmayıb və deyərdim ki, həmişə gərgin olub. O, polisə də bildirib hadisələri. O, mənim uşağa bir manat belə xeyrim dəymədiyini də söyləyib. Özü uşağını oxutdurub, ona maşın alıb. O, haqlıdır. Onu atalığı böyüdüb. Əgər mənim Əhədin üzərində haqqım olsaydı həqiqəti deyərdim. Amma bu yolla, Hikmətin oğludur deyib bir uşağı nahaqdan bu qədər incitmək olmaz. Axı biz insanıq. Allahımız qarşısında gerçəkləri gizlədə bilmərik. Əhəd hadisədə günahsızdırsa onu üzərində haqqı olmayan və illərlə onu görməyən atasına görə incitmək olmaz ”.
Hikmət Kərimov onu da qeyd etdi ki, media işçiləri hadisəyə ədalətli yanaşmalıdırlar. Bölmə rəisi onu bildirdi ki, o bu günə qədər susub və susmağının məqsədi aparılan istintaqa müdaxilə etməmək üçündür. Amma mətbuatda bəzi məlumatların doğru olmadığını görüb bu açıqlamaya ehtiyac olduğunu görür.

Qeyd edək ki, dünən gecə piyadanı vuran “Mersedes -Sprinter” markalı mikroavtobusun sürücüsü mediaya verdiyi açıqlamada bildirib ki, sərxoş piyada qəflətən yola çıxıb və onun maşınının qarşısına keçib. Zərbədən sonra piyada dünyasını dəyişib. Yolun digər zolağı ilə hərəkət edən “Porşe” sürücüsünun hadisə ilə heç bir bağlılığı yoxdur. 
Bizdə ataya görə övladın cəzalandırılması metodunu pisləyirik. Kərimov Əhədin yolu ilə gedərkən qarşılaşdığı və iştirakçısına çevrildiyi qəzanın günahkarı olmadığı məlumdur və təsdiqini tapıb. Lakin, Əhədin atası polis əməkdaşıdırsa bu heç kimə qısasın və ya ədavətin övladdan alınmasına imkanı vermir. 

Bu məsələdə həmkar yoldaşlarımızı da diqqətli olmağa çağırırıq. Kərimov Əhədin günahsız olaraq mənəvi sarsıntılara məruz qoyulmsına onlar da etiraz etməlidir.