Yaponiyanın şimal-şərqində baş verən və “Fukusima-1” atom elektrik stansiyasında nüvə qəzasına səbəb olan dəhşətli zəlzələdən yeddi il ötür. Bu gün ölkədə zəlzələnin qurbanlarının xatirəsi yad edilir

         Yenixeber.org:          2011-ci il martın 11-də saat 14:46 dəqiqədə Yaponiyanın Tohoku regionunun Sakit okean sahillərində 9 bal gücündə zəlzələ baş vermişdi. Yeraltı təkanlar nəticəsində 10 metrdən yüksək olan dalğalar Tohoku regionunu və digər əraziləri ağuşuna almışdı.

Milli Polis İdarəsinin yaydığı məlumata görə, həmin təbii fəlakət nəticəsində 2018-ci il martın 9-na olan son məlumata əsasən 12 prefekturada 15 min 985 nəfər həlak olub, 6 prefekturada isə 2 min 539 nəfər itkin düşüb.

Təbii fəlakət zamanı 470 min nəfər təxliyə edilib. Yaponiya Təbii Fəlakətlərin Nəticələrinin Aradan Qaldırılması İdarəsi bildirir ki, cari il fevralın 13-nə olan məlumata əsasən 72 min 349 nəfər bərpa işlərinin yubanması və digər səbəblərə görə hələ də təxliyə vəziyyətində yaşayır.