Xarici KİV-in məlumatına görə, Mərkəzi Kəşfiyyat İdarəsi (ABŞ) və Xarici Kəşfiyyat Xidməti (Rusiya) nümayəndələri bu barədə danışıqlar aparmaq məqsədilə Moskvada görüş keçiriblər («Exo Moskvı»).

"Xeberinfo.com":   Alman qəzeti «Bild»-in bazar günü əlavəsinin ABŞ kəşfiyyat dairələrindəki mənbəyə istinadla yazdığına görə, bu gizli görüşün məqsədi Suriya münaqişəsi üzrə hərbi əməkdaşlığın razılaşdırılmasından ibarət olub.

Guya, ABŞ hakimiyyəti bundan sonra Suriyadakı «İslam dövləti» terrorçularına qarşı Rusiyanın fəaliyyətini dəstəkləmək məqsədilə, kəşfiyyat materiallarının Moskvaya ötürülməsinə hazırdır.

Nəşrin yazdığına görə, Yaxın Şərqdə yaraqlıların sayının əhəmiyyətli dərəcədə artması və Avropaya qaçqın axınlarının güclənməsi dünyanın bu iki nəhəng dövlətini birgə fəaliyyət göstərməyə məcur edib. Hələlik, qəzetin yazdıqlarını rəsmi təsdiqləyən məlumatlar yoxdur. Amma nəşr artıq bu məsələ barədə Almaniyanın xarici işlər naziri Frank-Valter Ştaynmayerlə söhbətləşib.

«Nəhayət ki, Suriya problemi üzrə yenidən irəliləyiş müşahidə olunur. Mən bu faktı alqışlayıram ki, Vaşinqton və Moskva bu məsələ üzrə bir-birinin əleyhinə yox, bir-biri ilə işləmək qərarına gəlib» – deyə, almani nazir bəyan edib.

Bundan əvvəl xəbər verilmişdi ki, ABŞ-ın dövlət katibi Con Kerri Suriyanın prezidenti Bəşər Əsədi danışıqlar masası arxasına oturtmağı Rusiyadan xahiş edib.

AzPolitika.info