Namiq Quliyevin oğluna məxsus  “CASPEL” MMC-nin taleyi qaranlıqdır

Yenixeber.org: Keçmiş vergilər naziri Fazil Məmmədov vəzifəsindən çıxarılandan sonra onun nazirlikdə yüksək vəzifələrə çəkdiyi yaxınları, qohumları da işdən alınıb. Bunlar arasında təzə qohum olduğu müavini Namiq Əliyev, qrup yoldaşları, həmçinin bacısının əri olan Namiq Quliyev də var.

Qeyd edək ki, F.Məmmədov bir qayda olaraq yaxın çevrəsində olan şəxsləri nəinki Vergilər Nazirliyində işə götürməklə kifayətlənib, həmçinin onlara yüksək vəzifələr, bəzən vəzifəni aşan səlahiyyətlər verib. Belələrindən biri də yeznəsi Namiq Quliyevdir. Vergilər Nazirliyi yanında Vergi Cinayətlərinin İbtidai Araşdırılması Departamenti rəisinin 1-ci müavini işləyən Namiq Quliyev ötən ay vəzifəsindən kənarlaşdırılıb.

Xatırladaq ki, N.Quliyev Vergilər Nazirliyi yanında Vergi Cinayətlərinin İbtidai Araşdırılması Departamentində birinci müavin vəzifəsində işləyib. Daha sonra  F.Məmmədov onu özünə vergi cinayətlərinin ibtidai araşdırılması məsələləri üzrə müşavir təyin edib. Elə bu vəzifədə işlədiyi dövrdə də nazir qaynı onu ali dövlət mükafatı almağa namizədlərin siyahısına salıb. Nəticədə 2015-ci ilin sentyabrında dövlət başçısının sərəncamı ilə ona 3-cü dərəcəli dövlət ədliyyə müşaviri xüsusi rütbəsi verilib. 2016-cı ilin fevralında isə F.Məmmədov yeznəsini müşavirlikdən azad edərək yenidən Vergi Cinayətlərinin İbtidai Araşdırılması Departamenti rəisinin 1-ci müavini postuna təyin edib. Bununla da adı çəkilən departament rəisinin müavinlərinin sayı 3-ə çatıb.

N.Quliyev nazir qaynının “səxavətindən” yalnız fəxri ad almaq üçün yararlanmayıb. Belə ki hələ ad almazdan 4 il əvvəldən – 2011-ci ildən N.Quliyevin oğluna məxsus olduğu deyilən “CASPEL” MMC-nin gətirdiyi nəzarət-kassa aparatları və POS terminalları vergi ödəyicilərinə məcburən satılıb.

“Yeni Müsavat”ın həmin vaxt əldə edərək ictimailəşdirdiyi sənədlərdən aydın olur ki, 15 noyabr 2011-ci il tarixdə Vergilər Nazirliyində nəzarət-kassa aparatları üzrə sahələrarası ekspert komissiyasının iclası keçirilib. İclasın 48 nömrəli protokoluna görə, komissiyaya vergilər naziri Fazil Məmmədov sədrlik edib. İclasın gündəliyində dayanan məsələ nəzarət-kassa aparatlarının yeni modellərinin dövlət reyestrinə daxil edilməsi olub. Sadə dillə desək, komissiya vergilər naziri Fazil Məmmədovun bacısı – yəni N.Quliyevin oğlunun adına rəsmiləşdirilmiş “CASPEL” MMC-nin ölkəyə gətirdiyi kassa aparatlarının satışını təşkil etmək üçün qərar verib.

Qərarı əks etdirən protokolda göstərilir ki, “4613-XXX” tipli İBM POS terminalının və “Mini-T 400 ME” markalı nəzarət-kassa aparatları qüvvədə olan texniki tələblərə cavab verdiyi üçün  “Ticarət, iaşə, xidmət və digər fəaliyyət sahələrində əhali ilə nağd hesablaşmaların aparılmasında tətbiq olunan nəzarət-kassa aparatlarına Texniki Tələblər”in 2-ci bəndində nəzərdə tutulmuş 3-cü qrup kompüter uçot sistemli aktiv nəzarət-kassa aparatları qrupuna aid edilib.

İclasda F.Məmmədovun özü də çıxış edib. Yekun qərarda göstərilir: “”4613-XXX” tipli İBM POS terminalının əhali ilə nağd pul hesablaşmaları aparmaqla fəaliyyət göstərən bütün obyektlərdə, o cümlədən yanacaqdoldurma məntəqələrində, “Mini-T 400 ME” markalı nəzarət kassa aparatlarının isə yanacaqdoldurma məntəqələri istisna olmaqla əhali ilə nağd pul hesablaşmaları aparmaqla fəaliyyət göstərən digər bütün obyektlərdə tətbiqinə icazə verilsin”.

Elə bu “icazə”dən sonra iş adamlarının qara günləri başlayıb. Onların hamısı  “CASPEL” şirkətinin satdığı kassa aparatlarını almağa məcbur ediliblər. Sahibkarlara açıq bildirilib ki, şirkət vergilər nazirinin bacısı oğlunundur, kim o aparatları alıb quraşdırmasa, vəziyyəti pis olacaq. “4613-XXX” tipli aparatın öz qiyməti 1980 manat, quraşdırılma xərci isə 520 manat təşkil edib. Beləliklə, bir kassa üçün sahibkarlardan 2500 manat alınıb. Yanacaqdoldurma məntəqələrindən isə tələb edilib ki, hər kolonkaya bir aparat qoyulsun. Yəni YDM-də 4 kolonka varsa, onun sahibi 4 aparat almalı, 10 min manat pul ödəməliydi. Hansı ki, kassa aparatlarının satışı ilə məşğul olan digər 20-dək şirkət bu aparatları 240 manata satırdılar.

“Mini-T 400 ME” aparatını isə sahəsi 50 kvadratmetrə qədər olan obyektlərə qurşadırmağı tələb ediblər, onu “CASPEL” 700 manata satıb. Başqa kassa aparatı satan şirkətlər isə analoji cihazı 150 manata satırdılar. Maraqlı burasıydı ki, “Mini-T 400 ME” aparatının istifadəsi istehsal olunduğu Rusiyada 2006-cı ildən qadağan edilmişdi.

Beləliklə də, Azərbaycana kassa aparatı gətirən 20-dək iş adamı müflis olundu, bütün bazar verildi F.Məmmədovun yeznəsi və bacısı oğlunun nəzarətinə. Bu alverdən sabiq nazir və qohumları onlarla milyon manat qazanc əldə etdilər. Sahibkarlar isə bir qədər itirdilər.

Onu da qeyd edək ki, “CASPEL” MMC qeyd olunan kassa əməliyyatına qədər dövlət satınalmalarında iştirak edərək çoxsaylı tenderlərdən qalib ayrılırdı. Məlum kassa əməliyyatından sonra onun sifarişləri getdikcə artıb. Əsas alıcısı isə əlbəttə, Vergilər Nazirliyi idi. Məsələn, 2014-cü ildə Vergilər Nazirliyi 11 mln. 273,2 min manat məbləğində informasiya-kommunikasiya xidməti alıb. Həmin məbləğin böyük hissəsi məhz “CASPEL” MMC-nin payına düşüb: 5 mln. 747 min manat.

2015-ci ildə Vergilər Nazirliyi “CASPEL” MMC ilə “195″ Çağrı Mərkəzi sisteminin avadanlıqlarına texniki xidmətin göstərilməsi üçün 64 900 manat, Giriş-Çıxış Access Control sistemlərinə, səs avadanlıqları və konfrans sistemlərinə, müşahidə, yanğın və siqnalxəbərverici sistemlərinə texniki xidmətin göstərilməsi üçün 174 085 manat, Zərif müştərilərə (elektron disksiz qurğulara), zərif müştəri serverlərinə, məlumat saxlama avadanlıqlarına, UPS-lərə, printerlərə və digər korporativ şəbəkə və server avadanlıqlarına (Exchange, TMG, Legalands, Spam, Antivirus, Message, Backup serverlər) texniki xidmətin göstərilməsi üçün 365 003 manat, AVİS ehtiyat sisteminin avadanlıqlarına, elektron vergi hesab-faktura xidmətini təmin edən avadanlıqlara, ”SunServerləri”nə texniki xidmətin göstərilməsi üçün 678 429 manat, İskratel ATS-ə texniki xidmətin, ümumi kompüter şəbəkəsinə rabitə xidmətinin, korporativ rabitə şəbəkəsinə telefon və kommunikasiya xidmətinin göstərilməsi üçün 896 658 manat və Oracle proqram təminatına illik dəstəyin göstərilməs üçün 300 000, “Texniki və Akis sistemi avadanlıqlarının, proqram təminatlarının, kabel çəkilişinin və quraşdırma işlərinin yerinə yetirilməsi”nin satın alınması üçün 579 129,99 manat, kartriclərin satın alınması məqsədi ilə 99 844,52 dəyərində müqavilə imzalayıb.

Ötən il də kifayət qədər bol olan qalibiyyətli tenderlərdə şirkətin sifarişçiləri arasında Vergilər Nazirliyindən əlavə, Kənd Təsərrüfatı Nazirliyi, Əmlak Məsələləri üzrə Dövlət Komitəsi, Dövlət Sərhəd Xidməti, Hesablama Palatası, Maliyyə Nazirliyi, Müdafiə Nazirliyi və digər böyük qurumlar var.

Şirkətin İnternet saytında qeyd olunur ki, “CASPEL” Azərbaycan Respublikasının ərazisində informasiya texnologiyaları və telekommunikasiya sahəsində kompleks həll variantlarını təqdim edən ən iri inteqrator şirkətlərdən biridir. Şirkət məlumatların ötürülməsi üzrə həll variantlarını, proqram təminatının işlənib hazırlanmasını, İT avadanlıqları və kompüterlərin istehsalı ilə məşğul olan dünyanın qabaqcıl şirkətlərindən müasir avadanlıqların təchizini və servis xidmətini təqdim edir.

“CASPEL” şirkəti Azərbaycanın bütün ərazisini əhatə edən özünün fiber-optik şəbəkəsinə də malikdir.

Vergilər Nazirliyinin hüquqi şəxslərin elektron reyestrində yer alan məlumatdan aydın olur ki, “CASPEL” MMC-nin hüquqi təmsilçisi Quliyev Ceyhun Məhi oğludur. Himayədarı vəzifədən alınandan sonra şirkətin taleyinin necə olacağını isə yəqin ki, zaman göstərəcək(musavat)