Xudatın icra nümayəndəsi Akif Mərdanov sahibkarları aylığa oturdub

Xeberinfo.com:   Bu barədə Politika.Az-a məlumat verilib. Məlumata görə, A.Mərdanov Xaçmazda icra başçısının müavini olub. 

Onun vəzifəsindən kənarlaşdırılıb Xudata gətirilməsinin səbəbləri var. Bu səbəblər barədə danışan mənbə qeyd edir ki, Mərdanov elə getməyə məcbur olub. 
Onun düşdüyü situasiyadan rayon ictimaiyyəti xəbər tutub. Amma qaynağımız iddia edir ki, Mərdanov həmin əməlini Xudatda davam etdirir. 

Qaynağımız bildirir ki, A.Mərdanovun Xaçmazda bütün obyektləri əlindən çıxıb. Buna səbəb də məhz başçı müavini vəzifəsində olarkən başına gələn əhvalatdır. 

Bir müddət əvvəl Mərdanov öz yaxın ətrafı arasında tezliklə rayon icra hakimiyyətinin başçısı olacağı haqda təbliğata başlamışdı. 

Belə ki, A.Mərdanov özünə yaxın bildiyi şəxslər arasında parlament seçkilərindən sonra hazırkı icra başçısı Şəmsəddin Xanbabayevin vəzifədən azad olunacağını və onun bu posta təyin ediləcəyini bildirirdi. Lakin onun arzusu ürəyində qalıb. 

Məlumata görə, onun adı qətl işində də keçib. Xaçmaz mərkəzi bazarının sahibi Nəcimə Babayevin öldürülməsi haqda oğlu Fuad Həbibov danışarkən Mərdanovun da adını çəkmişdi:

“Keçmiş icra başçısı Əbülfəz Hüseynovun dövründə hazırkı icra başçısının müavini Akif Mərdanov, Azad Yaqubov və digərləri birləşib bazarı anamdan almaq istəyirdi. Gəlib camaatı bazardan çıxarıb deyirdilər ki, çıxın gedin, bazar bağlanır. 

Bu şəxslər hələ 2007-ci ildə bazarın ələ keçirilməsi planı başlayanda Xanbabayevə anamız haqqında biryolluq tədbir görülməsi barədə ərizə yazıblar. Akif Mərdanov isə guya sıravi vətəndaş kimi Məlikova müraciət yazıb. 

Anamın direktoru olduğu ticarət mərkəzinin fəaliyyətinin dayandırılmasını, əvəzində isə yeni ticarət mərkəzinin yaradılmasını tələb edib. Bu faktlar bazarı anamın əlindən kimlərin almaq istəməsini açıq-aşkar ortaya qoyur”. 

Qarşı tərəfi dinləməyə hazırıq.