Sabiq səhiyyə naziri Əli İnsanovun cinayət işi üzrə zərərçəkən kimi tanınan şəxsin kimliyi bəlli olub.

Yenixeber.org:  Sabiq nazirin ittiham aktına istinadən verdiyi xəbərə görə, bu, Ədliyyə Nazirliyi Penitensiar Xidmətin Əməliyyat-Rejim İdarəsinin Rejim-nəzarət şöbəsinin baş əməliyyat müvəkkili ədliyyə mayoru Anar Məmmədovdur (O, Ədliyyə Nazirliyinin Penitensiar Xidmətinin sabiq rəis müavini Gülməmməd Məmmədovun oğludur. Anar Məmmədovun atası vəzifəsindən azad olunduqdan sonra həbs edilib. Həbsdən çıxdıqdan az sonra isə vəfat edib – Strateq.az).

İttiham aktına əsasən  Əli İnsanov saxlandığı cəzaçəkmə müəssisəsinin inzibati binasında (rəis müavininə məxsus otaqda) barəsində protokol yazan Anar Məmmədovu döyüb. Əli İnsanovun zərbəsindən sonra Anar Məmmədov yıxılıb. Ona kəllə-beyin travması, habelə, digər xəsarətlərlər yetirilməsi barədə ekspertiza rəyləri ittiham aktına yazılıb.

Ancaq məhkəmə zalında ifadə verən Anar Məmmədovu görən proses iştirakçıları 71 yaşlı Əli İnsanovun idmançı cüssəli bir gənci döyməsinə təəccüblənib.

Strateq.az xəbər verir ki, prosesdən sonra döyüldüyü iddia edilən Anar Məmmədova yaxınlaşan Gununsesi.info-nun əməkdaşı hadisə barədə ondan soruşub:

– Doğrudanmı, Əli İnsanova döyüləcək qədər zəifsiniz? Olay necə yaşandı, danışa bilərsinizmi?

– Mən sizə niyə danışmalıyam ki…

Fikirlərimi məhkəmədə demişəm. Əlavə deyəcəyim bir şey yoxdur. Hadisənin necə olması sizə maraqlıdırsa, məhkəmədə bunu öyrənə bilərsiniz. 

– Axı, inandırıcı deyil ki, yaşlı bir insan sizi 35 gün xəstəxanalıq edib. Əli İnsanov məhkəmədə bildirdi ki, siz ona qurulan oyunun iştirakçısı olmusunuz.

– Mən sözümü məhkəmədə dedim. Təkrarlamağa ehtiyac yoxdur.