Daxili İşlər Nazirliyi (DİN) Çevik Polis Alayının (ÇPA) 45 yaşına çatmış əməkdaşları DİN-in digər bölmələrinə keçirilirlər.

Yenixeber.org:   Bu barədə Bakipost.az-a şikayətində adının çəkilməsini istəməyən ÇPA əməkdaşı məlumat verib.

O bildirib ki, 45 yaşına çatmış əməkdaşların ÇPA-dan uzaqlaşdırılması qanunsuz bir qərardır: "Deyirlər ki, guya bu tapşırıq cənab nazir Ramil Usubov tərəfindən verilib. Biz buna qətiyyən inanmırıq. Cənab nazir heç vaxt belə qanunsuz tapşırıq verməz. Sadəcə onun adından istifadə olunur. Bu, ÇPA rəhbərliyinin öz qərarıdır. Məqsəd 45 yaşa çatmış əməkdaşları bu bəhanə ilə ÇPA-dan uzaqlaşdırıb, bizim yerimizə müəyyən maraqlarını təmin edərək yeni əməkdaşlar götürməkdir. Xahiş edirəm bizim səsimizi cənab nazirə çatdırın”.

Şikayətçi bildirir ki, ÇPA-da əməkhaqqı bir qədər yüksək olduğundan bu, gələcəkdə alacaqları pensiyaya da təsir edir: "45 yaşına çatmış əməkdaşların əksəriyyətinin pensiya vaxtına az müddət qalır. Yəni onsuz da qısa müddətdən sonra hamımız pensiyaya çıxacağıq”.

DİN-in mətbuat xidmətindən məsələyə münasibət bildirməyiblər.