Bakıda keçirilən Formula 1 üzrə Azərbaycan Qran-prisinə start verilib.

Yenixeber.org xəbər verir ki, birinci sərbəst yürüş saat 13:30-da başlayıb.

Bu gün "Formula 1"də ikinci test yürüşü, "Formula 2"də isə sıralama turu gerçəkləşəcək.

"Formula 2"də sərbəst yürüşdə ən yaxşı nəticəni "Van Amersfoort Racing"dən Entso Fittipaldi göstərib.

Qeyd edək ki, Azərbaycan Qran-prisi sentyabrın 15-də başa çatacaq.

Qazancı məhkəmə hökmləri, təhdid və şantaj olanlar...

“Jurnalist fikrimi kontekstdən çıxarıb”, “Məndən bir şey yazsan məhkəmədə görüşəcəyik”, “yazdıqların hamısı şər-böhtandır”, “jurnalistlər şantajla məşğuldur” və s. Bu sayaq “mövqe” nümayişinin demək olar ki, hər gün dəfələrlə şahidi oluruq. Gözlərimiz görməkdən, qulaqlarımız eşitməkdən az qalır “mazol” olsun. Yalnız vəzifəsi və parası artıq olanlardan nə qədər sayqısızlıq, təhdid yaşamaq olar...

Bəzən isə hətta buna da “şükr” deməli oluruq. Hansısa bir məlumatı dəqiqləşdirmək istiqamətində saatlarla, günlərlə çaba xərcləsək də, “daşdan, qayadan səs çıxır” bizim ərköyün məmurlardan yox. Ən yaxşı halda isə “suallarını məktubla göndər, cavab verərik” deməklə vəzifələrini bitmiş bilirlər. Hansı zamanda yaşadıqlarının fərqinə varmaq, operativ jurnalistika deyilən bir nəsnəni anlamaq belə istəmirlər. Artıq gec olur, məlumat ictimailəşir. Sonra,... sonra da mənasız şantajlar, təhdidlər, məhkəmələr və bəzən də dostların xahişləri.

Nə təəssüf ki, bütün bunlar çağdaş Azərbaycan jurnalistikasının bir üzüdür. (Siyasiləşmiş jurnalistika bir başqa...) Həm də ən çox haqqında danışılan və tənqid olunan üzü. Haqqı çatan da, çatmayan da jurnalistləri dəqiqləşdirilməmiş, nə bilim böhtan dolu məlumatlar yaymaqda ittiham edir.

Olsun, bəlkə belə də olur. Amma, peşəkar jurnalistikadan danışıb, dərs keçənlər nədənsə problemin kökünə varıb, səbəblərdən danışmaqda həvəsli görünmürlər. Məlum qanunlara uyğun olaraq səlahiyyət sahiblərinin vəzifələrindən biri də, məhz jurnalistlərlə işləməkdir. Ən azı birbaşa olmasa da, müəyyən görəvlənmiş şəxslər (Mətbuat xidmətləri, ictimaiyyətlə əlaqələndirici və s.) vasitəsi ilə. Belə ştatlar da var, bu görəvdən maaş alanlar da...

Əksər hallarda dövlət qurumlarında nəinki birinci, ikinci, üçüncü sima ilə, mətbuata məsul şəxslə belə, birbaşa əlaqə yaratmaq cəhdi nəticəsiz qalır. Mətbuata məsul olanlar (Əgər varsa da) mətbuatla işləməyi unudub, başqa-başqa işlərlə baş qatırlar. Hətta Təhsil Nazirliyi, Səhiyyə Nazirliyi, Satınalmalar üzrə Dövlət Agentliyi və s. kimi əhəmiyyətli qurumlar rəsmi sorğuları belə cavablandırmırlar. Sayqısızlığın adı bilinməyən həddi budur. Belədə əyrini əyri, düzü həmvar yazmaq olarmı? Bəs səbəb nədir? Səbəbkar kimdir?

Nədənsə bizim hörmətli peşəkarlar qeyr-dəqiq məlumatın ictimailəşməsində bu səbəb və səbəbkarları unudurlar. Özbaşınalığı özlərinə peşə edənlər qorunur, hədəf birmənalı şəkildə jurnalistlər olur. Qazancı məhkəmə hökmləri, təhdid və şantaj olan jurnalistlər.

Məhkəmə demişkən, Ədliyyə Nazirliyinin Kollegiyası “Mətbu nəşrlərin təsis edilməsi barədə müraciətlərin qəbulu və uçotunun aparılması Qaydaları”nı təsdiq edib. Yeni qaydaya görə ildə iki dəfə məhkəmə xəbərdarlığı alan mətbu nəşrin fəaliyyətini dayandırmaq mümkü oluna bilər. Söhbət məhkəmənin hansısa qərarından yox, məhkəmə xəbərdarlığından gedir.

Bax belə, bir xəbərdarlıq yetər ki,...

İlqar Salmanov

“Kredit qalmaqalı”nın növbəti qurbanları bankirlər olacaq

Bankla kreditorlar arasındakı “armatur əməliyyatı”nın üstü açılsa, ...

Beynəlxalq Bankın İdarə Heyətinin sədri vəzifəsini əvəz edən Emil Mustafayev və ətrafı nədən narahatdır?

Maliyyə nazirinin müavini “sudan quru çıxa biləcəkmi”?

Cahangir Hacıyevn müəmmalı şəkildə “səhhətinə görə” Azərbaycan Beynəlxalq Bankın İdarə Heyətinin sədri vəzifəsindən azad edilməsi, onun səlahiyyətlərinin icrasının müavini Emil Mustafayevə həvalə olunması ilə bağlı redaksiyamıza maraqlı məlumatlar daxil olub.

Əvvəla, Cahangir Hacıyevin məhz səhhətinə görə Azərbaycan Beynəlxalq Bankının rəhbərliyindən kənarlaşdırılması ilk günlərdən də inandırıcı görünmürdü. Bugünə kimi Cahangir Hacıyevin hansısa ağır xəstəlikdən əziyyət çəkməsi ilə ilə bağlı məlumat olmayıb. Belə məlumatları bir qayda olaraq uzun müddət gizli saxlamaq da olmur. Sonrakı məlum proseslər də cənab Hacıyevin sağlığında problem olmadığını isbatladı.

Elə “xeberinfo.com”a daxil olan bir məlumat da bunu söyləməyə imkan verir. Məlumata görə, Azərbaycan Beynəlxalq Bankının xarici dövlətlərin maliyyə qurumlarından Azərbaycan dövlətinin zəmanəti ilə götürdüyü kreditlərlə bağlı məsələ elə şəkil alıb ki, iqtidar kəskin tədbirlər görmək məcburiyyətində qalıb. Cahangir Hacıyevin iqtidar üçün önəmli şəxslərdən olması onun həbsinə yol vermədiyi üçün, bank sədrini “səhhətinə görə” vəzifəsindən kənarlaşdırıblar. Bankın idarə heyəti sədrinin səlahiyyətlərinin icrasının sədr müavini Emil Mustafayevə həvalə olunması isə iki məqamla izah olunur. Birincisi, bu məsələ bankın nizamnaməsinə uyğun həyata keçirilib. İkincisi isə, məlumatlara görə Azərbaycan Beynəlxalq Bankının bir neçə şirkətə verdiyi və həcmi milyard manatı keçən problemli kreditlərlə bağlı müqaviləni bir qayda olaraq məhz Emil Mustafayev imzalayıb. (Bu şirkətlərin bəziləri ictimaiyyətə məlum olsa da, hələlik mətbuatda adları hallanmayanları da var.) Kredit götürənlər danışıqları əsasən onunla və Azərbaycan Beynəlxalq Bankının korporativ biznes departamentinin direktoru Yasin Cəlilovla aparıblar. Bu iki şəxs bir neçə şirkətin maliyyə vəziyyəti yaxşı olmamasına baxmayaraq, onlara kredit verməkdə davam ediblər. Məlum olduğu kimi də, bu cütlük hətta bəzi şirkətlər götürdükləri kreditin faizini ödəyə bilmədiyi halda belə onlara əlavə kreditlər veriblər. Bu səbəbdəndir ki, Azərbaycan Beynəlxalq Bankının problemli kreditlərinin həcmi artıq milyard manatlarla ölçülür. Halbuki həmin pullar bankın özünün deyil. Azərbaycan dövlərinin zəmanəti ilə xarici maliyyə qurumlarından əldə edilib. Yəni bir neçə şirkətin bankdan götürdüyü və artıq geri qaytarmaq imkanında olmadığı bu pulları sahibinə, xarici dövlətlərin maliyyə qurumlarına və beynəlxaql maliyyə təşkilatlarına Azərbaycan dövləti qaytarmaq məcburiyyətindədir.

İndi isə hakimiyyət Azərbaycan Beynəlxalq Bankının hazırkı rəhbərliyinin üzərinə problemli kreditlər məsələsini həll etmək vəzifəsini qoyub. Bu məsələ birbaşa Emil Mustafayevin üzərinə əsas vəzifə kimi qoyulub. Onun, eləcə də Beynəlxalq Bankın başqa rəsmilərinin də gələcək taleləri məhz bu məsələnin həllindən asılı olacaq. Məlumata görə, əgər məsələ dövlətin maraqlarına uyğun həll edilməsə, Azərbaycan Beynəlxalq Bankında həbslər ola bilər. Bu zaman bankın Müşahidə Şurasının sədri, maliyyə nazirinin müavini Azər Bayramovun da karyerasına təhülükə yaranacaq. Onunla birgə bankın Müşahidə Şurasının üzvü, Əmlak məsələləri Dövlət Komitəsi sədrinin müavini Rüstəm Şahbazovun və Müşahidə Şurasında dövlət qurumlarını təmsil edən digər məmurların da karyeraları təhlükə altına düşəcək. Bankın İdarə Heyəti sədrinin səlahiyyətlərini icra edən Emil Mustafayev və korporativ biznes departamentinin direktoru Ysin Cəlilovla yanaşı idarə heyəti sədrinin müavinləri Vaqif Əkbərov, Qubad Hüseynov və Rəşad Hacıyevin məsuliyyətə cəlb olunması məsələsi gündəmə gələ bilər. Qeyd edık ki, Rəşad Hacıyev həm də bankın baş maliyyə direktoru vəzifəsini daşıyır və yaranmış vəziyyətə görə əsas məsuliyyət daşıyan şəxslərdən hesab olunur.

Məlumatlı şəxsin bildirdiyinə görə, əgər Azərbaycan Beynəlxalq Bankı ilə bir neçə şirkət arasındakı müəmmalı kredit sövdələşmələrinin üstü tam açılsa çox ciddi faktlar üzə çıxacaq. Yalnız bankla kreditorlar arasındakı “armatur əməliyyatı”nın üstü açılsa, bankın bir neçə rəsmisinin bu əməliyyatlardan hansı pulları və necə qazandığı üzə çıxacaq. Baxmayarq ki, bu zaman Azərbaycan dövlətinə külli miqdarda maliyyə ziyanı dəyməsi ehtimalı mövcud olub və bankın rəhbər işçiləri öz maraqlarını daha üstün tutublar...

Beynəlxalq Bankda müammalı olaylar

Aprelin əvvəlində “PaşaBank”ın İdarə Heyətinin sədri Fərid Axundovun Beynəlxalq Bankın İdarə Heyyətinin sədri təyin edilməsi haqqında məlumat elə bu xəbərin yayıldığı günün sonunda təkzib olundu. Bununla bağlı “xeberinfo.com”a daxil olan məlumata görə, həqiqətən Fərid Axundovun Beynəlxalq Bankın İdarə Heyyətinin sədri təyin edilməsi ilə bağlı bankda toplantı olub. Toplantıda Beynəlxalq Bankın xarici ölkələrdəki nümayəndəliklərinin rəhbərləri də iştirak ediblər. Onların təcili Bakıya çağrılması da Beynəlxalq Bankda ciddi bir hadisənin baş verdiyinin sübutudur. Bu isə Banka yeni rəhbər təyin edilməsindən başqa bir hadisə ola bilməz. Ancaq Fərid Axundovun Beynəlxalq Bankın İdarə Heyyətinin sədri təyin edilməsindən bir neçə saat sonra bu təyinat ləğv edilib və mətbuatda banka yeni sədr təyinatı ilə bağlı məlumatlar təkzib edildi.

Bununla bağlı bankdakı mənbəmizdən aldığımız məlumata görə, Fərid Axundovun Beynəlxalq Bankın İdarə Heyətinin sədri təyin edilib, ancaq sonradan bu təyinatı sadəcə üç aylıq təxrə salıblar. Bunun isə özəl səbəbi var. Bankda vəziyyət həddindən artıq ağırdır, bu səbəbdən də vəzyyəti yeni sədrin çiyinlərinə yükləməyin uyğun olmayacağını əsas götürüblər. Yuxarıda qeyd etdiyimiz kimi, Bankın rəhbərliyində təmsil olunan şəxslərə, xüsusilə indi idarə heyətinin sədri vəzifəsini icra edən Emil Mustafayevin üzərinə ciddi vəzifələr qoyulub. Bu vəzifə isə əsasən böyük məbləğdə kreditlərin geri qaytarılmasını təmin etməklə bağlıdır. Mənbəmiz bildirir ki, bu çox çətin vəzifədir və Emil Mustafayevin üç ay müddətində bu vəzifənin öhdəsindən gələ biləcəyinə ümid yox idi. Belə də məsələyə hüquq-mühafizə orqanlarının müdaxiləsi zərurətə çevrildi. Beynəlxalq Bankın İdarə Heyətinin sədr əvəzi olan Emil Mustafayevlə başqa vəzifəlilərin taleyi bu üç aylıq müddətdə Bankda baş verəcək prosesdən asılı idi. Məlumata görə bankın korporativ biznes departamentinin direktoru Yasin Cəlilov və “Premyer” Müştəri Xidmətləri Filialının müdiri Fuad Cəfərovun da taleyi sual altındadır.

Beynəlxalq Bankla bağlı əldə etdiyimiz digər ilginc məlumatları araşdırmağa çalışırıq. Yazıda adla hallanan tərəflərlə əlaqə yaratmaq cəhdlərimiz isə hələ ki, nəticəsiz qalmaqdadır. Emil Mustafayevə ünvanladığımız 24. 04. 2015-cil tarixli 011/015№-li məktuba hələ də cavab ala bilmirik

İri biznes nümayəndələrinin ardınca

bankirlərin həbsi gözlənilir

Azərbaycan Beynəlxalq Bankının kredit qalmaqalının həbslərə səbəb olacağı gözlənilən idi. Hələlik bank rəhbərliyindən həbslər olmasa da, (Dubay filialının müdirindən başqa) proses davam etməkdədir. Bu istiqamətdə “xeberinfo.com”a daxil olan məlumata görə, həbs olunan və sonradan azadlığa çıxan iş adamlarının yalnız çox kiçik bir hissəsinin adı mətbuata sızıb. Ancaq Daxili İşlər Nazirliyinin Mütəşəkkil Cinayətkarlığa Qarşı Mübarizə Baş İdarəsində bu şəxslərdən başqa da iş adamlarının da olduğu deyilir. Sadəcə olaraq onların çoxu ictimaiyyətin tanıdığı isimlər deyil. Həm də bu şəxslərin yaxınları hələ nə edəcəklərini bilmədikləri üçün mediaya məlumat verməkdən çəkinirlər. Daxili İşlər Nazirliyinin Baş Mütəşəkkil Cinayətkarlığa Qarşı Mübarizə İdarəsinin həbslərə əl atmasının səbəbi isə Azərbaycan Beynəlxalq Bankı və eləcə də digər bankların kredit fırıldaqlarına qısa zamanda son qoymaq üçün alternativ yolun olmamasından irəli gəlir. Çünki, bankdan iri məbləğdə kredit götürmüş, onun önəmli bir hissəsini mənimsəmiş və eyş-işrətlərə xərcləmiş iş adamlarının ölkədən qaçmaq təhlükəsi varmış. Daha doğrusu bankların, xüsusilədə Azərbaycan Beynəlxalq Bankının əsaslandırılmamış və tam girovla təmin olunmamış kredit fırıldaqlarında önəmli rol oynamış Bünyamin adlı şəxsin hüquq-mühafizə orqanlarının diqqətindən yayına və ölkədən qaça bilməsi digərlərinin də ölkədən qaçmaq təhlükəsi doğurduğundan həbslərə start verilib.

Həbs olunan iş adamlarının ifadələri isə müxtəlif bankirlərin, xüsusilə də qalmaqallı kreditlərin 60%-i payına düşən Azərbaycan Beynəlxalq Bankının bəzi əməkdaşlarının həbsini reallaşdıracaq. Məsələn, “Xəzər Adaları” layihəsinin sahibi Hacı İbrahim Nehrəmli mətbuat nümayəndələri ilə aprel ayında keçirdiyi görüşdə bildirmişdi ki, o üç binanın girov qoyulması müqabiləndə Azərbaycan Beynəlxalq Bankından 314 milyon manat kreditlə bağlı müqavilə bağlayıb. Çox maraqlıdır Hacı İbrahimin bu sözləri görüşdə iştirak edən media təmsilçilərinin diqqətini cəlb etməmişdi. Halbuki Hacı İbrahim faktiki olaraq mövcud olmayan 3 binanı girov qoymaqla Azərbaycan Beynəlxalq Bankından 314 milyon manat kredit götürür. Mövcud olmayan binalara görə Azərbaycan Beynəlxalq Bankının belə iri həcmli krediti verməyə niyə razı olmasına da Daxili İşlər Nazirliyinin Baş Mütəşəkkil Cinayətkarlığa Qarşı Mübarizə İdarəsi aydınlıq gətirməli olacaq.

Bütün bunlara görə Azərbaycan Beynəlxalq Bankının sabiq sədri Cahangir Hacıyev, onun birinci müavini Emil Mustafayev və bankın “Premyer Müştəri Xidmətləri” filialının müdiri Fuad Cəfərov cavab verməli olacaqlar.

Bu olay Maliyyə Nazirliyində də araşdırılmalıdır. Çünki, Azərbaycan Beynəlxalq Bankının Müşahidə Şurasına Maliyyə nazirinin müavini Azər Bayramov rəhbərlik edir. Nazir müavinindən başqa Maliyyə Nazirliyinin daha üç əməkdaşı da Azərbaycan Beynəlxalq Bankının Müşahidə Şurasında təmsil olunur. İndi söz hörmətli maliyyə naziri Samir Şərifovundur. Azərbaycan Beynəlxalq Bankında baş verən kredit fırıldağına nazirliyin niyə göz yummasına aydınlıq gətiriməlidirlər. Əks halda deyəsən bu məsələyə də Daxili İşlər Nazirliyinin Baş Mütəşəkkil Cinayətkarlığa Qarşı Mübarizə İdarəsi aydınlıq gətirməli olacaq.

Biz hörmətli Azər Bayramova da 15. 05. 2015-cil tarixli 017/015№-li məktub ünvanlamışıq. Hələlik yaza bilmədiyimiz detallara cənab Bayramovun münasibəti maraqlı olardı. Təəssüf ki, nazir müavini hələ də məktubumuza cavab vermir.

Mövzu diqqətimizdədir.

Hökumətdə gözlənilən struktur dəyişikliyi nələr vəd edir: kimlər qalacaq, kimlər gedəcək?

İllərdir ki, beynəlxalq maliyyə qurumları (xüsusi ilə də Dünya Bankı) Azərbaycan hakimiyyəti qarşısında hökumətdə struktur dəyişikliyi məsələsini qaldırmaqdadır. İndiyədək bu, həlli vacib problem kimi dəfələrlə səslədirilsə də, susqunluq müşahidə olunurdu. Rəsmi Bakı ən yaxşı halda müxtəlif arqumentlərlə bu təkliflərin mənasızlığını əsaslandırmağa çalışırdı...

İslahatlar qaçılmazdır

Alınmadı, dünyada, yaxın qonşularımızda və ölkəmizdə yaşanan məlum hadisələr Azərbaycan hökumətində islahatları labüdləşdirdi. Başlıcası iki səbəbdən: Əvvəla siyasi hakimiyyət manatla bağlı məlum ajiotajı yatırmaq, cəmiyyətin diqqətini bu faktordan yayındırmaq üçün müəyyən addımlar atmaq zorundadır. Bu kütləyə təskinliklə bərabər, müəyyən ümüd də vermiş olar. Bir neçə nazirlik, komitə və ASC-ni birləşdirmək və eyni zamanda birmənalı ictimai rəyə malik olmayan hansısa birinci şəxsləri “vurmaq”la bu nəticəyə sahib olmaq mümkündür.

Digər tərəfdən, ictimai rəy öz yerində, de-fakto hökumət bu sayda aparatı saxlamaq gücündə deyil. Obrazlı desək, xərci borcun ödəmir. Elə son zamanlar müxtəlif büdcə təşkilatlarındakı kütləvi ixtisarların da bu səbəbdən qaynaqlanması sirr deyil.

Bütün bunlar hökumətdə müəyyən struktur dəyişikliyini zərurətə çevirdi. Artıq beynəlxalq təşkilatlarla bərabər, mətbuatın da ara-sıra toxunduğu bu məsələ müstəqil ekspert və hakimiyyətyönümlü deputatların da dilindən səslənir. Bir müddət əvvəl deputat Zahid Oruc yeni söz deyirmiş kimi, Milli Məclisin tribunasından hökumətdə islahatların vacibliyindən danışdı, hətta konkret təkliflər verməkdən də çəkinmədi. Cənab Zahid Oruc İqtisadiyyat və Sənaye Nazirliyinin Standartlaşdırma, Metrologiya və Patent üzrə Dövlət Komitəsi ilə, Tələbə Qəbulu üzrə Dövlət Komissiyasının Dövlət Qulluğu Məsələləri üzrə Komissiya İlə, Meliorasiya və Su Təsərrüfatı ASC-nin Kənd Təsərrüfatı Nazirliyi ilə birləşdirilməsi kimi təkliflər səsləndirdi. Məlum siyasi reallıqlara bələd olanlar üçün hörmətli deputatın bu təşəbbüsdə bulunması birmənalı qarşılanmadı. Bunu Zahid müəllimin öz ağılının məhsulu, şəxsi təşəbbüsü saymaq çətindir.

“Döyüşə” nazirlər gedir

Bu arada əksəriyyəti düşündürən başlıca sual hansı strukturun Dövlət Torpaq və Xəritəçəkmə Komitəsinin, hansı nazirin isə Qərib Məmmədovun taleyini yaşayacağı ilə bağlıdır. Öncə qeyd edim ki, gözlənilən və zəruri olan dəyişiklik Zahid Orucun məlum siyahısı ilə yekunlaşmır. Vergilər və Maliyyə nazirlikllərinin və Dövlət Gömrük Komitəsinin bir qurumda birləşməsi də mümkündür. Əmək və Əhalinin Sosial Müdafiəsi Nazirliyi, Səhiyyə Nazirliyi və Dövlət Sosial Müdafiə Fondu da eyni siyasəti-dövlətin sosial siyasətini həyata keçirir. Bəzi güc nazirliklərində də eyni funksiyaya malik idarələr var. Mədəniyyət və Turizm Nazirliyi və Gənclər və İdman Nazirlikləri ilə də doğma qurumlardır. Sənaye və Energetika Nazirliyi və “Azərenerji” SC də SOKAR-da “əriyə” bilər. Bu siyahını uzatmaq da olar.

Doğrudur, bu proses işsizlər ordusunun yaranması ilə də nəticələnə bilər. Çoxları bunun kütləvi narazılığa səbəb ola biləcəyini düşünür. Bəlkə də bu ilk baxışdan belə görünə bilər. Amma bu hansısa sosial təhlükə doğuracaq həddə ola bilməz. Əgər söhbət islahatdan gedirsə, eyni zamanda sahibkarlığa diqqəti artırıb, bank sektorunda müəyyən yumşaltmalarla gözlənilən sosial narazılığı neytrallaşdırmaq mümkündür.

Bu arada xüsusi ilə diqqəti çəkən məqam adıçəkilən və çəkilməyən dövlət qurumu rəhbərlərinin taleyi ilə bağlıdır. Başqa sözlə, proses gerçəkləşmiş olarsa hansı nazir postunu qoruya biləcək? Kimlər qurbanlıq ola bilər? Kimlər daha şanslıdır? Sadalanan suallar nəinki əhəmiyyətlidir, bəlkə də prosesin baş tutması belə, bu sualların cavabından asılıdır.

Ramiz Həsənov, yoxsa Şahin Mustafayev? Fazil Məmmədov, yoxsa Samir Şərifov? Səlim Müslümov, yoxsa Oqtay Şirəliyev? Azad Rəhimov, yoxsa Əbülfəs Qarayev? Rövnəq Abdullayev, yoxsa Natiq Əliyev? Və s. Adları çəkilənlərin hər biri şanslı görünməklə bərabər, iddialı da ola bilərlər. Həm də şansları və iddiaları da ən azı bərabər görünür. Bu vacib məqam başqa yazının mövzusudur. Bəlkə də yazıların ... hər bir cütlüyün nüfuz və imkanlarının analizi üçün.

Əsas odur ki, toxunduğumuz dəyişiklik, gözlənilən islahat zəriri və vacibdir. Həm dövləti, həm də vətəndaş marağı naminə. Əlahəzrət zamanı gözləyək.

Bu təzadı, ikili yanaşmanı doğuran səbəb nədir?

Standartlaşdırma, Metrologiya və Patent üzrə Dövlət Komitəsindən günəbaxan tumları ilə bağlı müraciətə anlaşılmaz yanaşma

Oxucularımıza da məlumdur ki, biz son vaxtlar günəbaxan tumlarl ilə bağlı silsilə yazılar hazırlayırıq. Şübhəsiz ki, bunun əsaslı səbəbləri də var. Bu səbələr haqqında ötən yazılarımızda geniş bəhs etmişik. İnsan sağlamlığı, xüsusi ilə də azyaşlılarda həm də digər zərərli vərdişlərin formalaşmasına təhlükə mənbəyi kimi günəbaxan tumlarına diqqət çəkməyə çalışmışıq. Bu real bir problemdir və biz də bu problemin üzərinə getməyi özümüzə borc bilirik.

Bir qrup ölkə vətəndaşının müxtəlif dövlət instansiyalarına ünvanladığı müraciətin surəti redaksiyamıza da daxil olub. Sonradan bu müraciətlərlə biz də maraqlanmalı olduq. Müxtəlif dövlət təşkilatlarına rəsmi sorğu da ünvanladıq. Bu istiqamətdə mövqeyi xüsusi ilə maraq doğuran dövlət instansiyası Standartlaşdırma, Metrologiya və Patent üzrə Dövlət Komitəsi oldu. Artıq 3 aydır ki, bu komitənin sədri cənab Ramiz Həsənova ünvanlanan müraciətdən demək olar ki, əsər-əlamət yoxdur. “Demək olar ki,” ona görə deyirik ki, bu günə qədər komitə 2 günəbaxan tumları-“Patron” və “Bizim ailə”-ilə bağlı qaneedici olmasa da belə cavab verib. Qalan 10-a yaxın günəbaxan tumlarından isə hələ də xəbər yoxdur. Maraqlıdır, nə üçün? Nədən hörmətli Ramiz Həsənovun rəhbərlik etdiyi komitə digər firmaları “unudur”? Bunun başqa adı ikili standart deyilmi? Və s.

Bu da qanun...

Əldə etdiyimiz məlumatlara görə məlum müraciətlə bağlı Standartlaşdırma, Metrologiya və Patent üzrə Dövlət Komitəsinin nümayəndələri bütün günəbaxan tumunun istehsalı ilə məşğul olan firmalarda araşdırma aparıblar. Biz müxtəlif yollarla bunu müəyyənləşdirmişdirə bilmişik. Hətta, adının çəkilməsini uyğun bilmədiyimiz komitə rəsmisi də bunu etiraf etdi.

Amma, vətəndaşların müraciətinə cavab verilmir... Olsun, biz həm “xeberinfo.com” olaraq, həm də “Yeni xəbər” qəzetinin səhifəsində mövzunu davam etdirəcəyik. Hələlik isə, cənab Həsənovun rəhbərlik etdiyi komitənin məsul şəxslərinin diqqətinə “Vətəndaşların müraciətlərinə baxılması qaydası haqqında” Azərbaycan Respubikası Qaunundan 2 maddəni çatdırıram.

1) Maddə 5. Dövlət hakimiyyəti orqanlarının, idarələrin, təşkilatların, müəssisələrin vəzifələri

Dövlət hakimiyyəti orqanları, idarələr, təşkilatlar, müəssisələr Azərbaycan Respublikası Konstitusiyası və qanunları ilə müəyyən edilən və təminat verilən qaydada Azərbaycan Respublikası vətəndaşlarının yazılı və şifahi şəkildə təkliflər vermək, ərizə ilə müraciət etmək, vəzifəli şəxslərin qanuna zidd hərəkətlərindən (hərəkətsizliyindən) şikayət etmək hüquqlarının həyata keçirilməsi üçün zəruri şərait yaradılmasını təmin etməlidirlər.
Dövlət hakimiyyəti orqanları, idarələr, təşkilatlar müəssisələr, onların rəhbərləri, digər vəzifəli şəxslər vətəndaşların təkliflərini, ərizə və şikayətlərini qəbul etməyə və özlərinin səlahiyyətinə uyğun olaraq bu Qanunla müəyyən edilmiş qaydada və müddətlərdə baxmağa, lazımi tədbirlər görməyə və onlara cavab verməyə borcludurlar.
Dövlət hakimiyyəti orqanlarının, idarələrin, təşkilatların, müəssisələrin rəhbərləri və digər vəzifəli şəxsləri təkliflərə, ərizə və şikayətlərə baxarkən:
onların mahiyyətini diqqətlə öyrənməli, zəruri olduqda lazımi sənədləri tələb etməli və məsələnin həlli üçün başqa tədbirlər görməlidirlər;
təkliflərin, ərizə və şikayətlərin baxılmasının nəticəsi haqqında vətəndaşlara yazılı şəkildə məlumat verməli, onlar təmin edilmədikdə bunun səbəblərini göstərməli, şikayət vermək qaydasını izah etməlidirlər;
təklif, ərizə və şikayətlər barəsindəəsaslandırılmış qərarların qəbul edilməsini və bu qərarların vaxtında və düzgün yerinə yetirilməsini təmin etməlidirlər.
Dövlət hakimiyyəti orqanları, idarələr, təşkilatlar, müəssisələr vətəndaşların müraciətlərinə baxılması vəziyyətini müntəzəm olaraq yoxlamalı və qanunla mühafizə olunan mənafelərinin pozulması iləəlaqədar təkrar ərizə və şikayətlərin verilməsi ilə nəticələnən sənədlərin aradan qaldırılması üçün tədbirlər görməlidir.

2) Maddə 10. Müraciətə baxılma müddəti

Qanunvericilikdə nəzərdə tutulan hallar istisna olmaqla müraciətə, qanunvericiliklə başqa müddət nəzərdə tutulmamışdırsa 1 ay müddətinədək, əlavə öyrənilməsi və yoxlanılması tələb edilməyən müraciətəən geci 15 gün ərzində baxılmalıdır.
Müraciətə baxılmaq üçün xüsusi yoxlama keçirmək, əlavə materiallar tələb etmək, yaxud başqa tədbirlər görmək lazım gəldiyi hallarda müvafiq orqanın, idarənin, təşkilatın, müəssisənin rəhbəri və ya onun müavini müraciətə baxılma müddətini müstəsna hallarda ən çoxu bir ay uzada bilər. Bu barədə müraciət edən vətəndaşa, müraciətin baxılması dövlət hakimiyyəti orqanı tərəfindən nəzarətdə saxlandıqda isə dövlət hakimiyyəti orqanına məlumat verilməlidir.
Hərbi qulluqçuların və onların ailə üzvlərinin müraciəti daxil olduğu gündən etibarən ən geci 15 gün ərzində baxılır.
(Çıxarılıb)
Əgər məlumatın verilməsi barədə müraciətə yuxarıda göstərilən müddətlərdə baxılması nəticəsində lazım olan məlumat öz əhəmiyyətini itirə bilərsə, həmin müraciətə dərhal, bu mümkün olmadıqda isə, 24 saatdan gec olmayaraq baxılmalıdır.

***

Bu da qanun. Mən heç də elə düşünmürəm ki, cənab Həsənovun kadrları bunları bilməmiş olsun. Əsla, necə lazımdır bilirlər. Hə, necə əməl etmək lazımdır, onu da bilməmiş deyillər. Bizim isə bilmədiyimiz bir nəsnə var: bu təzadı, ikili yanaşmanı doğuran səbəb nədir? Bunu bilmək həm də bizim haqqımızdır. Yazılmış və yazılmamış qanunların verdiyi haqq.

Sağlığımızla oynadığı yetməyən “Çiko”, “Şirinlər”, “Mister tum”, “Beloçka”, “Patron”, “Əla tum”, “Sən sevən”, “Bizim ailə” və s.

Qablaşdırılmış qida məhsulları ilə bağlı ictimai rəyin birmənalı olmaması sirr deyil. Bu sırada isə günəbaxan tumları daha çox diqqəti çəkir. Kimisi bunların sağlığımıza qəsd olduğunu, kimisi işbazların yalançı uduş kampaniyaları ilə cibimizə girdiyini, kimisi də ümumiyyətlə tum yeməyi mədəniyyətsizlik hesab edir. Əslində bu de-fakto cəmiyyətdə problem olaraq var. Xüsusi ilə də azyaşlılarla bağlı... Təəssüf ki, bu problem naməlum səbəblərdən mətbuatın diqqətindən yayına bilir. Ən xırda olaya belə həssas olan Azərbaycan mediası nədənsə heç də kiçik olmayan fəsadlara yol açan bu problemin üzərinə getmir.

Diqqətli oxucularımıza da məlum olduğu kimi, biz “xeberinfo.com” olaraq son vaxtlar bu problemi ictimailəşdirməyə və aidiyyatı dövlət təşkilatlarının diqqətinə çatdırmağa çalışırıq. Problemlə bağlı bir qrup ölkə vətəndaşının müxtəlif dövlət strukturlarına ünvanladığı məktubun surəti redaksiyamıza da çatıb. Məktubda günəbaxan tumlarının gigiyenik normalara cavab verməməsi səbəbindən genefondumuza vurduğu zərbədən və qumar oynuna çevrilmiş saxta uduş kampaniyalarından bəhs olunur. Müəlliflər məlum vəzifəli şəxslərdən bu problemlərin araşdırılmasını və aradan qaldırılmasını xahiş edirlər.

Biz ilkin olaraq bu məktub əsasında “Genefondumuza “tum zərbəsi !”” başlıqlı yazı hazırladıq. Sonrakı günlərdə isə mütəxəssislərin və hüquqşünasın sözügedən problemə münasibətini ictimailəşdirməyə çalıdıq. Ardınca bir başqa yazı...

Paralel olaraq üç dövlət strukturuna-Standartlaşdırma, Metrologiya və Patent üzrə Dövlət Komitəsinə, İqtisadiyyat və Sənaye Nazirliyinə və Qiymətli Kağızla üzrə Dövlət Komitəsinə məktub ünvanladıq. Hələlik birinci instansiyadan iki günəbaxan tumları ilə bağlı (“Bizim ailə” və “Patron”) cavab almışıq. Cavab deyəndə ki, ... gözlədiyimiz kimi də oldu. Sən demə bu tumlarda satandartlaşdırma ilə bağlı problem yoxdur(?)

İqtisadiyyat və Sənaye Nazirliyinə isə konkret fakt da təqdim etmişdik. Söhbət uduş kampaniyasında haqqını ala bilməyən bir vətəndaşın müraciətindən gedir. Nazirliyin Antiinhisar Xidməti və İstehlakçıların Hüquqlarının Müdafiəsi Departamentindən üst-üstə 3 cavab məktubu aldıq. Məlum oldu ki, təqdim etdiyimiz fakt həqiqət imiş və məlum istehlakçının haqqı verilib... Ümumiyyətlə isə problemin araşdırılması “unuduldu”.

Qiymətli Kağızla üzrə Dövlət Komitəsindən isə hələ ki, cavab yoxdur. Telefon danışığımızdan məlum oldu ki, bu qurum da məktubumuzu araşdırmaqdadır.

Bəxtinizi bir daha sınayın !

Bütün bunlar öz yerində. Biz sonuncu instansiyadan da cavab aldıqdan sonra dövlət strukturlarının bu problemə yanaşması ilə bağlı əlavə yazı hazırlayacağıq.

Hələlik isə günəbaxan tumlarının sağlığımız və bəxtimizlə oynaması haqqında: Yəqin siz də müşahidə etmisiniz, əksər hallarda günəbaxan və qarğıdalı tumlarının qabından kimyəvi tərkibi məlum olmayan hansısa “kitayski” oyuncaq, hətta corab da çıxır. Bunun nə dərəcədə doğru olduğunu, sağlığımıza hansı zərbələri vurduğunu bilməkdən ötrü mütəxəssis olmağa ehtiyac yoxdur. Təəssüf ki, bizlər, xüsusi ilə də azyaşlılar həvəslə mağazaların piştaxtalarında bu məhsulları axtarırıq. Bugünün azyaşlısının günəbaxan tumlarına olan bu həvəsi 15-20 ildən sonra “uğurlu nəticəsini” göstərir. Sonsuzluq xəstəliyini başına bəla edib, klinikalarda sürünür...

İşbaz qardaşlarımız sağlığımızla oynamaqla kifayətlənməyib, həm də bəxtimizlə oynayır. “Bəxtinizi bir daha sınayın”, bu çoxlarımıza tanış nağıldır. Bunun başqa adı saxta uduş kampaniyaları ilə millətin başına corab hörməkdir. Etiraf edək ki, bu işbazlar bəxtimizlə oynamaqla müəyyən qədər müştəri də toplaya biliblər. İndi uşaqlar daha çox hədiyyə sahibi olacaqlar deyə, tum alırlar. Yeri gəlmişkən əksər hallarda uduş sevinci də ürəklərdə qalır. İşbazlar müxtəlif bəhanələrlə insanlara udduqları hədiyyəni verməkdən boyun qaçırırlar. Beləcə bəxtimiz də sağlığımızla bərabər qurbanlıq olur.

Ölkəmizdə qumar oyunları qanunla yasaqdır. Bəs bu nədir, qumar deyilmi? Bir-biri ilə çəkişən (Rəqabət deyə bilmədim) firmalar uduş kampaniyası adı ilə əsl qumarxana yaradırlar. İndi çoxlarının diqqətini çəkməyən bu mənzərə çox keçməz ki, bizi qumarbazlar ordusu ilə üz-üzə qoya bilər...

Mövzu diqqətimizdədir

İlqar

Yaxud əzizinin tumanı altında gizlənən “qəhrəman”

“Xeberinfo.com”: Birinci dəfə deyil mənə hürürlər. İndiyə qədər də çox hədə-qorxuların, vay-şivənlərin hədəfi olmuşam. Təəssüf ki, dalı başından yaxşı işləyənlərin “qəhrəmanlıq”ları günümüzün reallığı olaraq davam etməkdədir... Bu dəfə isə əzizlərinin tumanı altında gizlənib mənə hürürlər.

Redaksiyamızın elektron ünvanına müxtəlif qondarma adlarla təhqir və təhdid yazırlar. Doğmalarının-ailə üzvlərindən tutmuş “körpüdə yan-yana dəydiklərinə” qədər-layiq olub, haqq etdiklərinin eynisini...

Nə ad, nə də ünvan bəlli deyil, özləri kimi saxta, fuflo. Bu nə ya, bu nə rəzalət, bu nə şərəfsizlik. Arvadındanmı öyrəndin bunu gəda. Tuman altında gizlənib hürməyi sənə kim öyrətdi. İnanmıram ki, atanın kimliyini bilmiş olasan. Nə qədər olmasa da belə atandan xəbərdar olsaydın bunca şərəfsizlik etməzdin. Budurmu sənin yaşam etalonun, budurmu səni mövcud edən (Yaşadan demirəm...) amal?

Sən şərəfsiz olduğundan daha çox yazıq, müti bir məxluqatsan. Sən hansısa bir vəzifənin, pulun da sahibi ola bilərsən. Amma sən heç vaxt adam olmayacaqsan. Adam olan bəndədə az da olsa belə cəsarətdən, qorxmazlıqdan əsər-əlamət olar. Zərrə qədər də olsa cəsarətin varsa gizləndiyin tumanın altından başını çıxart, səni tanıyım və həyatın mənasını başa salım. Onsuz da gec-tez səni tapıb, əl atıb gizləndiyin yerdən çıxaracam.

Mən bilirəm ki, sən kiməsə yazdırırsan. Sən nə internetdən, nə yazıdan qanan deyilsən. (Mənim o “mirzə”yə də yazığım gəlir) Sən şərəfini satıb para qazanmaqdan başqa bir şey bilməzsən.

Yazdırırsan ki, ağıllı olum, saytda yazıları saxlayım. (Hansı yazıları bilə bilmədim). Bədbəxt sənin gözlərin kimi, ağlınıda tor basıb. Mən hər sənin kimi siçovulların təhdidindən qorxsaydım bu peşəni seçməzdim.

Bilirsiniz mənim üçün qısa da olsa belə bu sətirlərə müəlliflik etmək asan deyil. Ürəyim acıyır, təəssüf edirəm. Axı nədən bizim əksər məmurlar hələ də tənqidçi jurnalistikaya “qutuda ilan kimi baxırlar”? Axı nədən bizimlə əmkədaşlıq əvəzində, başqa yolu seçirlər? Beləcə bizim də vaxtımız və enerjimiz boşuna gedir, boşuna.

Şərhçilərimiz də əbədilik statusu alıb...

Bu mövzu, bu problem yeni deyil-az qala müstəqilliyimizin tarixi qədər yaşı var. Əslində bu çoxlarımız üçün təəccüblü də deyil: burada nə var ki, biz də hər şey əbədidir, dönməzdir yəni azərbaycansayağıdır.

Elə şərhçilərimiz də-nə adları dəyişir, nə də özlərinə məxsus sayıqlamaları. Hə, bu arada Bzejiniskiyə yazığım da gəlir. O bəxtixoş bilsəydi ki, nə vaxtsa mübarizlər, vəfalar, nə bilim daha kimlər özlərini politoloq kimi bizlərə sırımaq istəyəcəklər inanmıram ki, “ağzına su alıb durmayaydı”.

“Dəyişməzlik”, “Əbədilik” kimi sərsəm bayağıları bizim “dahilərimiz” öz istədikləri kimi qəbul etməkdədir. İstər siyasi, istər sosial, istər iqtisadi, nə bilim hərbi və s. sahədə “ekspertlərimiz” də illərdir ki, mənasiz sayıqlamaları ilə bizləri bezikdirməkdən usanmırlar. Gözlərimiz, qulaqlarımız “mazol” olub bunların özlərindən başqa heç kimə lazım olmayan sayıqlamalarına şahidlik etməkdən. Mübariz Əhmədoğludan tutmuş Vəfa Quluzayədək, Vahid Əhmədovdan tutmuş Qubad İbadoğlunadək özləri özlərini aldatdığı kimi, bizləri də aldatmağa çalışırlar. Mən hələ mənasız Üzeyir Cəfərovu demirəm...

Nədir illərlə davam edən bu rəzalət? Niyə biz jurnalistlər mübarizlərdən, vəfalardan, üzeyirlərdən qurtula bilmirik, bəlkə də qurtulmaq istəmirik?

Bəlkə də qurtulmaq istıyirik, ... alınmır. Alınmır, başqasını görmürük. Nədən ki, “siyasi şərhçi”, “iqtisadçı ekspert”, “hərbçi ekspert”, nə bilim daha hansısa vəzifələr də bu kəslər tərəfindən özləlləşdirilib. Hə, məhz vəzifə. Nə ağılabatan bir söz eşidirik bunlardan, nə də verdikləri hansısa proqnoz özünü doğruldur. Hərdən mənə elə gəlir ki, bunlar heç özləri də nə dediklərini bilmirlər. Ya bizləri ... sayırlar, ya da özləri ...

Maraqlıdır, maraqlı yox e, yumşaq desəm fəlakətdir, fəlakət: iyirmi ildən çoxdur ki, bu ölkədə nə siyasi, nə iqtisadi, nə hərbi, nə mətbuat və s. sahə üzrə yeni bir sima görünmür. Bəlkə də görünür... Bu gün bizim gündəmimizi bu kəslər formalaşdırıb analiz edir, proqnoz verirlər.

Bunca dəhşətin qarışılığında jurnalistika nədən bir yenilik nümayiş etdirə bilmir, bəlkə yeniləri yoxdur, yoxsa bizlər bunu bacarmırıq?

***

Bu günlərdə özünə hüquqşünas deyən bir kəsin anormal əməllərinin şahidi olmalı oldum. (Hələlik adını hallandırıb, onu şərəfləndirmək istəmirəm.) Saytımızda (xeberinfo.com) gedən bir yazı ilə bağlı mənim mobil telefonuma zəng etdi, əvvəlcə müxtəlif saytlarla əməkdaşlıq etdiyini deyib, (o saytların adını yazmağı uyğun bilmirəm) mənə “Cirtdanın nağılını danışdı”. Nə isə... Xahiş etdi ki, saytımızdan hansısa bir yazını çıxarım. Anlaşılmaz xahişinin və mənasız söhbətinin “daşa dəydiyini” görəndə isə çocuksayağı şantaja keçdi.

Doğrusu mən hansısa jurnalistin hansısa məmuru şantaj etdiyini eşitmişdim. Amma kiminsə jurnalisti şantaj etdiyinin ilk dəfə idi ki, şahidi olurdum...

Daha sonra bu əməli mənasız “hüquqşünas” mənim elektron ünvanıma nəinki hüquqşünasa uyğun, hətta küçə adamının ağlına uyğun olmayan tərzdə və səviyyədə dil uzatmaq istədi. Təəssüf, ... mən hələ ki, , vaxtımı və enerjimi boşuna xərcləmək istəmirəm.

Əslində bu sual Azərbaycan insanı üçün həmişə doğma olub. Bizlər heç nəyi qeyri-adi qəbul etməmişik. Gördüklərimiz, şahidi olduğumuz hadisələr nədənsə bizim üçün həmişə gözlənilən olub. Heç bir xəbərlə bizi təəccübləndirmək mümkün deyil.

Bu sualın yükünü isə daha çox media mənsubları çəkməli olub. “Gündəmdə nə var?”, “nə yazaq ki, oxunaq?” və s. kimi suallar bizim yazarların ağrılı yerinə çevrilib. Siyasətdən tutmuş kriminal mövzuya qədər heç bir xəbər, yaxud analizlə Azərbaycan oxucusunu şaşırtmaq mümkün deyil. Eyni zibildən, eyni ilə nə qədər yazmaq olar. İndi azərbaycanlıların istənilən xəbərə bir cavabı var: “nə olsun?”.

Deputat Elton Məmmədovun oğlu, ardınca isə Nazim İbrahimovun oğlu şəxsi təyyarəsini, nə bilim qiyməti yüzminlərlə ölçülən maşınlarını reklam edir. Bizlər də bunu ictimailəşdirməklə şok yaratmaq istəyirik. Alınmır-Azərbaycan oxucusunun cavabı yenə də eyni olur: “nə olsun?”. Bu gün nəinki deputat, nazir oğlunun, sıradan bir məktəb direktorunun da oğlu yüzminlik maşına sahib ola bilər. Burada təəccüblü nə var ki?

Son zamanlar biz “xeberinfo.com”da Ağdam və Ağcabədi rayonlarında bəzi vəzifə sahibləri və işbazların dövlət vəsaitini kütləvi mənimsəməsi faktlarından yazırıq. Yazılarımız konkret faktlarla davam edir. Düşünürük ki, bu araşdırmalarımızla həm dövləti maraqlarımıza xidmət etmiş olarıq, həm də oxucularımızın sayı artmış olar. Amma... Yenə də “nə olsun?”.

Bu ölkədə hansısa vəzifə sahibinin dövlətin malını yeməsində təəccüblü nə var ki? Belə də olmalıdır də. Təəccüblü bunun əksi olardı. Hansı ki, Azərbaycan insanı bunu heç yuxuda da görə bilməz.

Yaxud Bakını da özünə bənzədən Hacıbala Abutalıbovun son günlər dillər əzbəri olan “aforizmi”. Adam deyir ki, “bu ölkədə bir kişi var, o da cənab prezidentdir”. Heç kim də Hacıbala Abutalıbovdan bu sözə görə təəccüblənmədi. Nə olsun, Hacıbaladır də, ağlı, zəkası ilə həmişə seçilib.

“Nə olsun?” çağdaş Azərbaycan insanının “kəşf”i deyil. Yüzillərin sınağından keçib, dəyərini qoruyub bu “müdrük kəlam”. Müqəddəs bir əmanətdir əcdadlarımızdan bizlərə.

Bizim “nə olsun?”u göz bəbəyimiz kimi qoruyub, gələcək nəsillərə ötürmək kimi bir müqəddəs borcumuz da var. Qoy gələcək nəsillər də əcdadlarımız kimi, bizim kimi olsun. Bunun sayəsində biz həmişə dünya xalqlarından seçilməmişikmi?

Olmaz məgər, başqaları fərqlidir? Olsun də. Nə olsun?

Təhsil Azərbaycan insanının ən ağrılı yerlərindən olub və nə təəssüf ki, olmaqda da davam edir. Məlum səbəblərdən bu ölkənin hər bir ailəsi təhsilə bağlıdır. Və hər bir ailə də demək olar ki, eyni forma və səviyyədə təhsilin acısını yaşamaqdadır. İllərdir yaşanan bu acı artıq ümummilli faciəyə çevrilib. Ümüdlərin öldüyü, faciə dolu bir sonsuzluq...

Mikayıl Cabbarovun təhsil naziri təyinatı kütlədə az-çox ümüd yaratmışdı. Sadəlöhv insanlar “bu Avropa təfəkkürlüdür, təhsili düzəldəcək”, “gəncdir, rüşvətin qarşısını alacaq” və s. bu kimi sayıqlamada bulunurdu. Eyni ilə əksinə düşünənlər də var idi: “Mikayıl cabbarov hara, təhsil hara”, “İçəri Şəhər kimi, təhsili də biznes təfəkkürü ilə idarə edəcək” və s.

Yanaşmalardakı bu müxtəlifliyin ömrü uzun olmadı. 10 ay bir nazirin fəaliyyəti ilə bağlı ictimai rəyin formalaşmasında yetərli zamandır. Bir nazir üçün heç də az olmayan fəaliyyəti dönəmində Mikayıl Cabbarov təhsildən kənar, İçəri Şəhərlə Təhsil Nazirliyini eyniləşdirən birisi olduğunu isbatladı: təhsilin bütün pilləsində (Orta məktəblərdə, Kolleclərdə, Universitetlərdə) “ənənəvi qaydalar” nəinki qalmaqdadır, “inkişaf” var, “inkişaf”. Orta məktəblərdə müxtəlif adlarla pul yığımı, kollec və universitetlərdə “sezon biçimi” ...

İndi sıradan Azərbaycan ailəsini narahat edən bu arzuolunmaz “inkişaf”dır. Təhsil nazirinin Misir Mərdanov, yaxud Mikayıl Cabbarov olmasının bu ölkə insanı üçün nə fərqi. Təki bu “inkişaf”a son qoyulsun. Amma olmadı, əksinə artıq bütün kütlə Misir Mərdanovun atasına rəhmət oxuyur. Nə isə... Ölkə təhsilində artmaqda olan “besperedel”dən bəndəniz ara-sıra ərz edir.

Nazirin növbəti “kəşfi”

Mənşəyi məlum olmayan bəzi beynəlxalq təşkilatlar bir sıra “tarixi layihə”lərini Azərbaycan təhsilinə də sırımaqda davam edir. Bu layihələrin gizlinləri, onların müxtəlif adlarla (Kurrikulum, Boloniya sistemi və s.) nələri qaynatmaları geniş mövzudur. Və hesab edirəm ki, bu istiqamətdə ciddi jurnalist araşdırmasına ehtiyac var.

Təəssüf ki, bizim “başbilənlərimiz” də bu təşkilatların sayəsində Azərbaycan təhsilini əsl eksperiment mənbəyinə çevirib. Bu proses isə Mikayıl Cabbarov dönəmində xüsusi vüsət almaqdadır.. Artıq cənab Cabbarovun son “islahatları” kütləvi narazılıqla müşahidə olunur. Gənc nazirin müəllimlərin fərqləndirilməsi, eləcə də kollec məzunları ilə bağlı səsləndirdiyi, daha doğrusu artıq qəbul etdiyi “yeniliklər”i nəzərdə tuturam.

Birinci halın növbəti bürokratik əngəllərdən, korrupsiya əməllərindən nə dərəcədə sığortalanması müəyyən şübhələrə yol açır. Təklif ilk baxışdan cəzbedici görünsə də icra mexanizmi suallar doğuran detallarla zəngindir.

İkinci-kollec məzunlarının pedaqoji fəaliyyətinə qoyulan qadağa da yumşaq desək başadüşülən deyil. Doğrudur, oldu-olmadı bütün kolleclərin pedaqoq hazırlaması da qəbulolunan deyil. Pedaqoq yetişdirmək şərəfli olduğu qədər də məsuliyyətlidir. Təəssüf ki, bu məsuliyyət zaman-zaman kimlərinsə “yadından çıxdı” və sanki pedaqoq hazırlamaq kolleclər arasında dəbə mindi. Hansı ki, bu dəbin fəsadları da bu gün gözümüzü deşir.

Məncə kolleclərə pedaqoq hazırlamağı qadağan etmək yox, sadəcə kollecləri müxtəlif sahələr üzrə ixtisaslaşdırmaq daha uğurlu variant olardı. O zaman sənaye, iqtisadiyyat, nə bilim idarəetmə yönümlü kolleclər də pedaqoq hazrlamağı yaddan çıxarardlar.

Bakı şəhərində bir kollec var-Azərbaycan Dövlət Pedaqoji kolleci. Bu təhsil ocağı1919-cu ildən bu günə qədər müxtəlif adlarla da olsa pedaqoq hazırlğı üzrə ixtisaslaşmış yeganə orta ixtisas təhsil müəssisəsidir. Və etiraf edək ki, bu kollecə ictimai maraq heç də Azərbaycan Dövlət Pedaqoji Universitetindən zəif deyil. Sözsüz ki, bunun da özəl səbəbləri var . Görünür 95 illik təcrübədir bu marağı stimullaşdıran amil. Hal-hazırda bu kollecin 3000-dən çox tələbəsi var. İnternetdə axtarış verməklə həm kollec, həm də məzunlarının uğurları haqqında bilgi əldə etmək olar. Nə isə, mənim məqsədim Azərbaycan Dövlət Pedaqoji Kolleci haqqında yazmaq deyil.

Bu xatırlamada məqsədim pedqoq hazırlığının məhz bu kollecə etibar etməyin mümkünlüyüdür. Öz tarixi ənənəsi və hazırkı reytinqi ilə Azərbaycan Dövlət Pedaqoji Kolleci bunu haqq edir.

Hələlik isə təhsilimizin çağdaş durumu hansısa eksperiment labaratoriyasını xatırladır. Çox təhlükəli və kotostrofa aparan eksperimentlər...