«MTN işi» ilə bağlı yeni sensasion məlumat

Xeberinfo.com:   Keçmiş milli təhlükəsizlik naziri Eldar Mahmudov və dəstəsinin hakimiyyət komandasını özlərinə necə tabe etmələri barədə redaksiyamıza maraqlı məlumat daxil olub.

Məlumatda deyilir ki, keçmiş MTN şefi və dəstəsi yüksək vəzifəli məmurlara verilən dövlət telefonları ilə (4 nömrə) yanaşı, “Azərcell”, “Bakcell” və “Azərfon”un məmurlara verdiyi paket nömrələri də dinləyirmiş. Bundan başqa bəzi məmurların kabinetlərinə dinləmə qurğuları qoyulubmuş. Məlumatda bildirilir ki, dinləmələr nəticəsində hansısa məmurun qanunsuz əməli üzə çıxanda MTN-in keçmiş rəhbərliyi dərhal bundan həmin vəzifəli şəxsə qarşı kompromat kimi istifadə edib. Beləliklə də həmin məmur MTN-in toruna düşüb.

Məlumatda deyilir ki, təkcə məmurlar deyil, deputatlardan MTN-dəki dəstənin tələsinə düşənlər var. Eldar Mahmudov və dəstəsi həmin məmur və deputatlardan öz maraqları üçün istifadə edib.

Məlumata görə, hakimiyyətdə əsas narahatlıq bu kompromatların ictimailəşə biləcəyindəndir.

Eldar Mahmudovun yaxın adamı kimi tanınan Akif Mustafayevin (“Akula Akif”) ölkəni tərk edərkən bu kompromatların böyük qismini özü ilə apardığı ehtimal olunur.