“Can Azərbaycanın müstəqillik günündə sizinlə birlikdə olmaqdan məmnunam”.

Yenixeber.org: Bunu Türkiyə Prezidenti Rəcəb Tayyib Ərdoğan mayın 28-də Bakıda keçirilən "Teknofest Azərbaycan" festivalında çıxışı zamanı deyib.

"Can Azərbaycan xalqına səmimi qonaqpərvərliyinə görə təşəkkür edirəm. Xəzərin incisi Bakıda "Bir millət, iki dövlət" şüarı ilə "Teknofest" festivalını gerçəkləşdiririk", - deyə R.T.Ərdoğan bildirib.
 

Ərdoğan deyib ki, Qarabağı düşməndən azad edən Azərbaycanla iftixar duyur.
Türkiyə Prezidenti çıxışı zamanı dahi Azərbaycan şairi Əhməd Cavadın şeirindən bir bənd də söyləyib:
“Mən Türk övladıyam, dərin ağlım, zəkam var,
Nə vaxtacan çiynimizdə gəzəcəkdir yağılar?
Nə qədər ki, hakimlik var, məhkumluq var, mən varam.
Zülmə qarşı üsyankaram əzilsəm də susmaram!”.
Rəcəb Tayyib ərdoğan deyib ki, Türkiyə və Azərbaycan kədəri də, sevinci də bir olan, sözdə yox, əməldə qardaş olan iki dövlətdir.
“Türkiyə kimi bura da bizim vətənimizdir. Doğulduğumuz yerlər kimi bura da bizim yurdumuzdur. Türkiyənin hər qarışı da sizin vətəniniz, yurdunuzdur. Türk millətinin qəlbindəki Azərbaycan sevgisini kim çıxara bilər?! İki qardaşı kim ayıra bilər?!”.