Gənc qızı əvvəl təcavüz edib daha sonra yandırdıqları üçün 16 nəfər edam olunacaq.

Yenixeber.org: Bu tükürpədici hadisə Banqladeşdə baş verib.

Ölkənin Fen şəhərindəki məktəbin direktorunun sifarişi ilə yandırılan Nusrət Cahan Rafi adlı qız xəstəxanada aparılan müalicəyə rəğmən vəfat edib.

Bu işlə bağlı aparılan məhkəmə prosesi zamanı məktəb direktoru Sirac Udovla ilə yanaşı hadisədə əli olan 15 nəfərin edamı haqqında qərar verilib.


Nusrət Cahan Rafi

İddiaya görə, hadisə bu ilin mart ayının 27-də məktəb direktorunun otağında baş verib. Direktorun təcavüzünə məruz qalan Nusrət Cahan Rafi vəziyyəti ailəsinə danışıb. Bundan sonra şagird qızın ailəsi məktəb direktorundan məhkəməyə şikayət edib. Hakim qarşısına çıxarılan məktəb direktoru həbs edilərək cəzaçəkmə müəssisəsinə göndərilib.

Həbsdə olduğu müddətdə Nusrət Cahan Rafini öldürmək üçün planlar quran məktəb direktoru özünə yaxın şagirdləri yanına çağıraraq təlimat verib. Qız uşağını qətl etmək istəyən məktəb direktoru ölüm planını şagirdlərə anladıb. Məktəb direktoru ilə görüşün ardından - aprelin 6-da baş tutacaq sınaq imtahanından öncə məktəb qarşısında Rafini gözləyən şagirdlər onu insanların olmadığı bir sahəyə qaçıraraq yandırıblar. Hadisə yerində ağır yaralı halda tapılan məktəbli qız əvvəlcə Fen şəhər xəstəxanasında, daha sonra paytaxt Dakkada yerləşən xüsusi ixtisaslaşmış xəstəxanaya çatdırılıb. Həkimlərin səyinə baxmayaraq onun həyatını xilas etmək mümkün olmayıb. Rafi aprelin 10-da xəstəxanada vəfat edib.


Nusrət Cahan Rafi və edam olunacaq şəxslər

Bu hadisə Banqladeşdə böyük hay-küy yaradıb və insanlar cinayətə etirazlarını ifadə etməyə başlayıblar. İctimai rəyin iqtidarın xeyrinə olmadığını görən Baş nazir Şeyx Hasina Rafinin ailəsini ziyarət edib. Baş nazir qısa müddət ərzində məhkəmə prosesinin başa çatdırılması və cinayətdə əli olanlara dəhşətli cəza veriləcəyini bildirib.

Hadisədən 61 gün sonra, bu gün məhkəmə qərarını açıqlayıb. Məhkəmə sədri Məmun Ur Rəşid məktəb direktoru da daxil olmaqla cinayətdə əli olan 16 nəfər haqqında edam hökmü verib.

Qeyd edək ki, məktəb direktoru istisna olmaqla edam ediləcək digər 15 nəfər məktəblidir.(reytinq)