“İmtahanların ödənişli olub-olmayacaǧı ilə bağlı iqtisadçılar, Dövlət İmtahan Mərkəzi, Tarif Şurasının mütəxəssisləri tərəfindən birgə müzakirələr aparılıb, sənədlər hazırlanıb və Maliyyə Nazirliyinə təqdim edilib”.

Xeberinfo.com:  Bunu DİM sədri Məleykə Abbaszadə bu gün keçirilən brifinqdə deyib.

Bu işin hüquqi müstəviyə keçməsinə Nazirlər Kabinetinin qərar verməli olduğunu xatırladan M.Abbaszadə bildirib ki, imtahanların ödənişli olması üçün həmin xidmətlər Tarif Şurasının müvafiq siyahısına daxil edilməlidir: “Bu barədə qərar verildikdən sonra yekun müzakirələr aparılacaq. Belə ki, dövlət başçısının Dövlət İmtahan Mərkəzi haqqında apreldə imzaladığı müvafiq fərmanla Nazirlər Kabinetinə tapşırılıb ki, bütün qanunlar və normativ sənədlər yeni fərmana uyğunlaşdırılsın. İlk olaraq bu uyğunlaşdırma aparılmalıdır. Bu proses yekunlaşdıqdan sonra artıq DİM-in yeni funksiyalarının necə icra olunacağı müəyyənləşəcək və bu sahədə legitimlik yaranacaq. Daha sonra ictimaiyyətə yeniliklər barədə açıqlama veriləcək. Bununla əlaqədar Nazirlər Kabinetinin qərarını gözləyirik”. (lent.az)