Türkiyədə özünü din adamı kimi təqdim edən Adnan Oktarın keçmiş “kedicik”lərindən olan Ceylan Özgül Tvitter hesabında Oktar və onun qadın tərəfdarları haqqında şok məlumat paylaşıb.

Yenixeber.org: Keçmiş “kedicik” Ceylan Özgül Adnan Oktarın yanındakı qadınların cinayətkar olduğunu bildirib.

“Adnan Oktarın cinayətkar qruplaşmasından ayrılan biri kimi deyirəm, məsələni “kedicik” deyib, sadələşdirməyin. Vitrində məsum görünən bu qadınların bir qismi iki silahla gəzir. Müxtəlif cinayətlərə qarışdıqlarına şahidəm”.

Ceylan Özgül digər tvitində isə Adnan Oktarın tərəfdarlarına xəbərdarlıq edib:

“Hazırda cinayətkar qrupu dəstəkləyirsiniz. Sıra onu dəstəkləyənlərə gələcək. Dövlət sizi bilir və görür. Məncə, iki dəfə düşünün”.

Qeyd edək ki, Türkiyədə səhər saatlarında keçirilən əməliyyat zamanı Adnan Oktar və 235 tərəfdarı həbs edilib. O, cinayətkar dəstə yaratmaq, uşaqların cinsi istismarı, cinsi təcavüz, uşaq qaçırılması, şəxsi azadlıqdan məhrumetmə, dini inanc və hislərin istismar edilməsi, saxtakarlıq, cinayət yolu ilə əldə olunmuş pulun yuyulması, şəxsi həyatın gizliliyinin pozulması, terrorla mübarizə qanununa müxalif mövqe, təhdid, iftira, xalqı hərbi xidmətdən yayındırma, siyasi və hərbi casusluqda ittiham olunur.