Yenixeber.org: Maraqlıdır, Azərbaycan Zod qızıl yatağının fəaliyyətini bərpa edə bilərmi?

Sabiq Maliyyə naziri Fikrət Yusifov bildirib ki, Ermənistanın Zod qızıl yatağında 6 min nəfər işlətməsi tam qanunsuz, işğalçı bir siyasət nəticəsində baş verən haldır:

“Orada çalışanlar, ümumiyyətlə, bu işin başında dayananların başa düşməliydi ki, gec-tez sonluq bu cür olacaq. Burada Azərbaycan tərəfin heç bir günahı yoxdur. Azərbaycan öz haqq işi uğrunda mübarizə aparıb və torpaqlarını işğaldan azad edib, Zod qızıl yatağının Azərbaycana aid olan hissəsini geri qaytarıb. Yəni biz özümüzə aid olanı qaytarmışıq. İndi burada erməni işsiz qalıbsa, o, erməni hökumətinin özünün problemidir. 6 min nəfərin hər birinin orta hesabla 4-5 ailə üzvü varsa, deməli, təxminən 25 min insan gəlir mənbəyindən məhrum olub. Bunların hamısını vaxtında nəzərə almaq lazım idi”.

Həmsöhbətimiz qeyd edib ki, insanlarımız orada məskunlaşdıqdan sonra onlar üçün yataqların istismarı nəticəsində yeni iş yerləri açılacaq:

“Hökm deyil ki, oranı bu dəqiqə istismar edək. Bir ildən, il yarımdan sonra da istismar edə bilərik. Qızıl orda dayanıb, nə korlanır, nə sıradan çıxır. Zamanla orada öz vətəndaşlarımız çalışar, qızılı da Azərbaycan hökuməti hasil edər. İndiyədək qanunsuz olan istismara və bu işin həyata keçirilməsi üçün cəlb edilən xarici şirkətlərə gəldikdə isə təbii ki, onların qanunsuz əldə etdiyi gəlirlə bağlı Azərbaycan hökuməti beynəlxalq hüquqi müstəvidə məsələ qaldıracaq, çünki vurulan ziyan ödənməlidir. Ermənistan və onun cəlb elədiyi şirkətlər bunu ödəməyə məcbur olacaqlar”.

İqtisadçının sözlərinə görə, Zod qızıl yatağının Azərbaycana il ərzində nə qədər valyuta gətirəcəyini təxmini bilmək üçün ilk əvvəl həmin ərazidə müəyyən hesablamalar aparılmalıdır:

“O ehtiyatların dəqiq hesablamasını aparmaq lazımdır. Təbii ki, Zod Azərbaycanın ən böyük qızıl yataqlarından biridir. Belə bir yatağın olması Azərbaycan üçün çox önəmlidir. Bir ölkənin ərazisində qızıl yatağı varsa, onun valyuta, qızıl ehtiyatlarının formalaşmasında belə bir yatağın rolu əlbəttə ki, xüsusi olacaq. Hesablamalar aparıldıqdan sonra biz buradan əldə edəcəyimiz gəlirin məbləği ilə bağlı fikir səsləndirə bilərik. Bu gün onu demək biraz çətindir. Çünki illərdir oranı istismar edirlər və oradan nə qədər qızıl apardıqlarını bilmirik”.