Milli İncəsənət Muzeyində fevralın 5-də Azərbaycan musiqi mədəniyyətinin inkişafı və təbliğində müstəsna xidmətləri olmuş dahi bəstəkar Qara Qarayevin 100 illik yubileyinə həsr olunan "Qürur və Düha. Yaşayan Əfsanə" adlı sərgi açılacaq

Yenixeber.org: Muzeyin Mətbuat xidmətindən verilən məlumata görə, sərgidə bəstəkarın yaradıcılığına ithaf olunan 40-a yaxın qrafika, rəngkarlıq, heykəltəraşlıq və dekorativ tətbiqi sənət nümunələri nümayiş olunacaq. 

“Bəstəkar ürəkli rəssam” Mikayıl Abdullayevin Azərbaycan şairi və mütəfəkkiri Nizami Gəncəvinin “Yeddi gözəl” poemasına həsr etdiyi tablolar, ölkənin təsviri sənətinin görkəmli qadın rəssamlarından biri olan Elmira Şahtaxtinskayanın bəstəkar Qara Qarayevin obrazına həsr etdiyi portret-plakatı, görkəmli heykəltəraş Cəlal Qaryağdının bəstəkarın şərəfınə yaratdığı mərmərdən büstü və dünyaca məşhur klassik əsərlərə çəkilmiş illustrasiyalar bu qəbildəndir.

Sərgidə Azərbaycan Milli İncəsənət Muzeyi, Azərbaycan Dövlət Rəsm Qalereyası, Tahir Salahovun Ev Muzeyinin kolleksiyalarından və  Azərbaycan Xalça Muzeyindən əsərlər təqdim olunacaq.

Qara Qarayevin yaradıcılığı Azərbaycan musiqi sənəti tarixinin parlaq səhifələrini təşkil edir. Klassik və müasir musiqinin uğurlu sintezini yaradaraq mədəniyyətimizin inkişafına dəyərli töhfələr vermiş bəstəkarın müxtəlif janrlı əsərləri 20-ci əsr dünya musiqi mədəniyyəti xəzinəsinə daxil olub. “Yeddi gözəl” və “İldırımlı yollarla” baletlərinin, “Leyli və Məcnun” simfonik poemasının, “Don Kixot” simfonik qravürünün, həmçinin yüzlərlə müxtəlif janrlarda yazılmış dünya şöhrətli əsərlərin müəllifi olan Qara Qarayev Azərbaycan bəstəkarlıq məktəbinin inkişafına təsir göstərmiş, özünəməxsus yaradıcılıq yolu keçmiş, yeni nəfəs, yeni fikir gətirib.

Sərgi saat 17:00-da açılacaq.