Yenixeber.org: Son zamanlar aparıcı regional dövlətlər rəsmi Bakının daxili siyasətinə çox tez-tez qarışmağa başlayıblar. Bakının mərkəzində bu və ya digər dərəcədə əhəmiyyətli dövlət adamlarının siyasətinə və mövqeyinə qabaqcadan təsir edən hansısa əcnəbi güclərin olduğu və bu məsələdə sərbəst iştirakları göz önündədir.

Bir gün əvvəl biz mətnaltı siyasi çalar ala biləcək yeni qalmaqal – Mədəniyyət və Turizm Nazirliyinin əfsanəvi İran müğənnisi Ququşun Zaqafqaziya turnesinin təşkilatçılarına Bakıda konsert keçirməyə icazə verməməsi barədə yazmışdıq. Siyasi rejimin dəyişməsindən və teokratiyanın hökmranlıq etməsindən sonra öz Vətənini tərk etmiş İran müğənnisi təəssüf ki, təsdiq edir – erməni və gürcü hakimiyyətləri onu qəbul etməyə hazırdırlar, amma azərbaycanlılar… nədənsə ehtiyatla İrana baxaraq hərəkət edirlər.

Xəbər verdiyimiz kimi, Cənubi Azərbaycandan olan, vaxtilə inkişaf etmiş və işıqlı şah İranının simvoluna çevrilmiş əfsanəvi müğənninin Bakı konserti ləğv edilib. Səbəb olduqca formaldır. Guya Ququşun üçüncü əri milliyyətcə ermənidir. Və bu tolerant, mədəniyyətlərarası və sivilizasiyalararası dialoqların mərkəzi elan edilmiş Azərbaycanda baş verir?! Onlarla keçmiş Bakı ermənisinin Azərbaycan paytaxtına gəldiyi və köhnə küçələri ilə sərbəst gəzdiyi bir vaxtda onun qapıları əslən azərbaycanlı olan əfsanəvi müğənninin üzünə bağlanır? Nəsə alınmır. Və görünür, imtinanın səbəbi bu deyil, bu sadəcə bütün mədəniyyətlər və sivilizasiyaların gözündə ölkənin adını ləkələyən kifayət qədər qəribə bəhanədir.

Bütün gün Mədəniyyət və Turizm Nazirliyindən operativ reaksiya və əsaslandırılmış mövqe gözləmişik. Nazirliyin sükutu uzandı. Bəlkə hazırda turist kimi Bodrumda dincələn nazir Əbülfəs Qarayevi gözləyirlər?

Hər halda, nazirlikdə “erməni mətnaltısı” ilə bağlı yeni qalmaqalı şərh etmədilər. Amma virtualaz.org-un nazirliyə yaxın dairələrdən əldə etdiyi məlumatlardan məlum oldu ki, Ququşun Bakı konsertinə ən qətiyyətli şəkildə etiraz edən Azərbaycanın İrandakı səfiri Bünyad Hüseynov olub. Və ehtimal ki, Bünyad müəllim bu məsələdə Azərbaycan siyasi rəhbərliyinln yox, İran hakimiyyətinin, necə deyərlər, əhval-ruhiyyəsini ifadə edir.

Deməli, İran Ququşun Bakıda konsert keçirməsinə qarşı çıxır, elə deyilmi? Bəs suveren dövlətin işlərinə bu qədər qeyri-əxlaqi və diplomatik cəhətdən əsaslandırılmamış müdaxilənin səbəbi nədir? Bəyəm Ququş müxalifətçidir və ya Cənubi Azərbaycanın azad olması üçün mübarizə aparır? Bəlkə o indiki etiraz hərəkatının və ya “yaşıl inqilab”ın lideridir? Qətiyyən, Ququş siyasətdən kənardır.

Səbəb başqadır – Ququş hakimiyyəti tutmuş mollakratiyanın və klerikal ruhanilərin olmadığı İranı təcəssüm etdirir və simvollaşdırır. O yalnız bir dini obrazdır. Və görünür, İranda belə bir adamın müəyyən, bir-birinə yaxın ölkələrdə meydana çıxmasından ehtiyat edirlər. Tutaq ki, səfir Bünyad Hüseynov mollakratiyanın ədalətsiz qəzəbinə tuş gəlməkdən ehtiyat edir, onun şıltaqlıqlarını nəzərə alır. Amma onda Ququşun konsertini Yerevanda niyə ləğv etmirlər? Axı Ermənistan regionda İranın əsas müttəfiqidir?! Bu dövlətlərin münasibətləri böyük müttəfiqıik və strateji əməkdaşlıq ruhu ilə möhkəmləndirilib. Bəs rəsmi Yerevanın sərt reaksiyası haradadır?

Səfir Bünyad Hüseynov

Qəribədir, elə deyilmi? Azərbaycan səfiri Tehranın ehtimal edilən narazılığından narahatdır, erməni hakimiyyəti isə tamamilə özünə güvənərək Yerevanın mərkəzində konsertin keçirilməsini icazə verir. Məntiq hanı? Və doğrudanmı Ququş Bakıda İsrailin baş naziri və ya prezidentindən daha təhlükəli və gözlənilməz qonaqdır, biz hələ iki ölkənin sıx hərbi-siyasi əməkdaşlığı haqda danışmırıq. Səfirin hərəkətlərində məntiq yoxdur və siyasi konyunktura nəzərə çarpır. Görünür, Bünyad müəllim yalnız və yalnız siyasi və ya sosial sifarişi icra edir.

Və sonda bir neçə kəlmə Mədəniyyət Nazirliyinin siyasəti haqda. “Avrovizion” yarışması ərəfəsində Bakıda dəniz kənarındakı bulvarda böyük Kristal-zal tikdilər. Onun tikintisinə bir neçə yüz milyon xərcləndi. Baxmayaraq ki, konsert zalı illərlə boş qalır. Və nazirlik guya yeni turistlərin cəlb edilməsinə çalışır. Sual yaranır: niyə iranlılar və azərbaycanlılar Ququşun Tbilisidəki konsertlərində yığılmalıdırlar? Nə üçün Azərbaycandan olan turistlər çoxdan gözlənilən konsertə bilet almaq üçün Tbilisinin konsert salonlarının qarşısında növbədə dayanmalıdırlar?

Bəyəm konserti Bakıda, Kristal-zalda təşkil edib İrandan Azərbaycana minlərlə turist cəlb etmək olmazdı?! Axı, ən azı söhbət həm də böyük gəlirdən gedir! Məmurlar, sözün yaxşı mənasında, dövlət büdcəsinə nə vaxt öz ciblərinə baxan kimi baxacaqlar? Və doğrudanmı, hər dəfə ən elementar problemin həlli üçün işə ölkə Sahibinin qarışması lazımdır? Onda nazirliklər və nazirlər nəyə lazımdır?

Deyəsən, uzaq siyasətə getdik. Gəlin, konsert zalına qayıdaq…