Amma qorodovoyların don Feyzullanın evindən bomba yerinə tapdığı qarpız kimi şirin, bal dadı verən qarpız tapmaq çox çətindir. Səbəbləri az sonra…

 8–ci kilometr (Vosmoy) bazarından qarpızın bu il niyə qıt, qiymətinin baha olmasını satıcılardan öyrənmişik.

Onların sözlərinə görə, əsas səbəb qarpız sahələrində pambıq əkilməsidir. Bu da məhsuldarlığın aşağı düşməsinə gətirib çıxarıb.

Hazırda qarpız əsasən Kürdəmir və Saatlıdan Bakı bazarlarına daşınır. Sabirabad, Neftçala sahələrində isə qarpız defisiti yaşanır. Demək olar ki, bu rayonlardan qarpız gəlmir.

Bərdə, Yevlax rayonlarından da qarpız bazarlara gətirilir. Satıcılar deyirlər ki, günə azı 3 ton qarpız satırlar. Onlar gəlirdən şikayətlənmirlər.

Deyirlər ki, bu il qarpız əkənlər də, satanlar da razıdır. Narazı olan isə alıcılardır. Çünki ötən il kilosu 8 –10 qəpi olan bu məhsul bu il kilosu azı 50 qəpikdən satılır.

Alıcılar da 4 kilo qarpıza 2 manat verməsindən gileylənirlər. Amma kilosu 50 qəpiyə qarpızı yalnız “Vosmoy” və digər bazarlarda tapa bilərsiniz.

Marketlərdə, binaların həyətlərindəki mağazalarda qarpızın kilosu 60–70 qəpikdən satılır. Üstəlik, həmin qarpızlar ağ çıxır, şirin olmur, müştəri daha da qəzəblənir.

Bazarda həmsöhbət olduğumuz satıcılardeyirlər ki, bal kimi şirin qarpız istəyən bura gəlsin: “Qardaş, biz məhsulu ən çox Kürdəmirdən, Saatlıdan gətiririk.

Sabirabad qarpızı qəhətə çıxıb. Bu il tələbat da çox oldu. Bazara gələn elə qarpız alır gedir.Bu il millətə nə olub, başım çıxmır. Keçən il qarpız alan olmurdu.

Siz kilosu 40 qəpiyə də qarpız tapa bilərsiniz. Amma etibar yoxdur da, apardın evə, bıçağı vurub kəsdin, gördün ağ balqabaq çıxdı”.

Satıcılar deyirlər ki, sentyabra qədər yaxşı alver gedəcək:“Vallah qıtlıq olsa da, narazı deyilik. Camaat istəyir, tələbat çoxalanda qiyməti qalxır.

Fermerlər bu il dərs çıxardılar, gələn il çoxlu qarpız əkəcəklər. İntəhası, sahələr yoxdur da, hamısında məcburi pambıq əkdiriblər. Əşi kimə lazımdır pambıq, camaat qarpız yeyir, pambıq yox…”.

Düzdür, nə deyirik, hər evdə qarpız, hamınıza nuş, satıcılara da bazar olsun….

Emil/AzEuroNews.com/