Sabah futzal üzrə Avropa çempionatının final mərhələsinə start veriləcək.

Xeberinfo.com:  Məlumata görə, Serbiyada keçiriləcək yubiley – 10-cu qitə çempionatında 12 ən güclü komanda mübarizə aparacaq.

Fevralın 13-dək davam edəcək yarış iştirakçıları Belqradda münasibətlərini aydınlaşdıracaq. Mükafatlar uğrunda indiyədək çempionluq sevinci yaşamış hər üç komanda da mübarizə aparacaq. İspaniya 7-ci, İtaliya 3-cü, Rusiya 2-ci dəfə qızıl medallara yiyələnmək əzmindədi. Son çempion olan appeninlilər həm də titulunu qorumalıdı.

Komandalar final mərhələsində 4 qrupda qüvvəsini sınayacaq. Sonuncu yer sahibləri mübarizəni dayandırdıqdan sonra Avropanın 8 ən güclüsü olimpiya sistemi ilə növbəti matçlarına çıxacaq.

Ardıcıl 4-cü dəfə final mərhələsində çıxış edəcək Azərbaycan millisi də 12 ən yaxşı arasında yer alıb. D qrupunda yer alan yığmamız son çempion İtaliya və Çexiya ilə üz-üzə gələcək. İlk dəfə yarışa Tino Pereslə yollanan yığmamız ilk turda appeninlilərlə qarşılaşacaq. Bu, final mərhələlərində 10-cu oyunumuz olacaq.

İki il öncə də İtaliya ilə eyni qrupda yer alan millimiz 0:7 hesablı məğlubiyyətin revanşını almağa, ən azı 1 xal qazanmağa çalışacaq. Yığmamız digər rəqibi Çexiya ilə AVRO-2010-nun final mərhələsində 2 dəfə qarşılaşıb. Həmin vaxt qrupda rəqibini yenən Joze Alesionun yetirmələri bürünc medal uğrunda qarşılaşmada uduzmuşdu.

Peresin yetirmələri mərhələ adlamağı bacarsa, C qrupunun komandalarından biri ilə görüşəcək. İtaliyanı arxada qoyacağı halda, futzalçılarımız həmin qrupun ikincisi – böyük ehtimalla Qazaxıstan və ya Xorvatiya ilə üz-üzə gələ bilər. Qrupu ikinci pillədə bitirəcəyi halda, Rusiya ilə görüşmək təhlükəsi yaranacaq. Çünki dünyanın ən güclü komandalarından biri olan şimal qonşularımızın öz qrupunda 1-ci olacağı gözlənilir.

Ümumiyyətlə, komandamızın tarixinin ən yaxşı nəticəsi də həmin vaxt Macarıstanda qeydə alınıb. Avropanın 4-cüsü olan millimiz sonrakı iki cəhddə qrup səddini adlaya bilməyib. Bu raundu 1 dəfə 1-ci, 2 dəfə 3-cü başa vuran futzalçılarımız hər üç çempionatda 13 dəfə qol buraxıb. 2010-cu ildə komandamızın üzvü Biro Jade 5 qolla final mərhələsinin ən yaxşı bombardiri mükafatına da yiyələnib.

Avro-2016-nın təqvimi 

A qrupu: Serbiya, Portuqaliya, Sloveniya

B qrupu: İspaniya, Ukrayna, Macarıstan

C qrupu: Rusiya, Xorvatiya, Qazaxıstan

D qrupu: İtaliya, Çexiya, Azərbaycan

I tur

2 fevral

21:30. Serbiya - Sloveniya

00:00. İspaniya - Macarıstan

3 fevral

21:30. Rusiya - Qazaxıstan

00:00. İtaliya – Azərbaycan

II tur

4 fevral

21:30. Sloveniya - Portuqaliya

00:00. Macarıstan - Ukrayna

5 fevral

21:30. Qazaxıstan - Xorvatiya

00:00. Azərbaycan - Çexiya

III tur

6 fevral

21:30. Ukrayna - İspaniya

00:00. Portuqaliya - Serbiya

7 fevral

21:30. Xorvatiya - Rusiya

00:00. Çexiya - İtaliya

1/4 final

8 fevral

1) 21:30. A1-B2

2) 00:00. B1-A2

9 fevral

3) 21:30. C1-D2

4) 00:00. D1-C2

Yarımfinal

11 fevral

21:30. 1-ci cütün qalibi – 3-cü cütün qalibi

00:00. 2-ci cütün qalibi – 4-cü cütün qalibi

III yer uğrunda oyun

13 fevral, 21:30

Final

13 fevral, 00:00

Qeyd: Oyunların başlama saatı Bakı vaxtı ilə göstərilib.

Avropa çempionatlarının mükafatçıları

Qeyd: 2003-cü ildə III yer uğrunda oyun keçirilməyib.

Azərbaycan milisi Avropa çempionatlarının final mərhələlərində