Bu gün Ağır Cinayətlər Məhkəməsində Bakıda sabiq polis rəisi Müşfiq Mədətovu və hazırda Səbail Rayon Polis İdarəsinin (RPİ) Əməliyyat işləri üzrə rəis müavini, polis polkovniki Orxan Axundzadəni öldürməyə cəhddə təqsirləndirilən Kazım Abbasov, Məhəmməd İsmayılov, Emin Həsənov və Ramal Ağayevin cinayət işi üzrə məhkəmə iclası davam etdirilib

Yenixeber.org: Hakim Ramella Allahverdiyevanın sədrliyi ilə keçirilən prosesdə təqsirləndirilən şəxslərdən birinin vəkili Adəm Məmmədov vəsatət qaldırıb.

O, məhkəmə zalında jurnalistlərin iştirak etməmələrini, onların çölə çıxarılmasını istəyib.

Hakim isə məhkəmə iclasının açıq olduğunu bildirib.

Daha sonra dövlət ittihamçısı ittiham aktını elan edib.

Elan olunmuş ittiham üzrə E.Həsənov, M.İsmayılov və K.Abbasov özünü qismən təqsirli bilib. R.Ağayev isə özünü təqsirli bilmədiyini deyib.

Məhkəmədə zərərçəkmiş Müşfiq Mədətov dindirilib. O, təqsirləndirilən şəxslərin heç birini tanımadığını söyləyib, M.Mədətov həmin şəxslərdən şikayət və tələbinin olmadığını deyib.

O vurğulayıb ki, kafedə olarkən heç bir səbəb olmadan tanımadığı şəxslər ona hücum edib: "İndiki ifadəmi təsdiq edirəm. Dediklərim doğrudur".

Dövlət ittihamçısının suallarından aydın olub ki, hadisəyə səbəb kimi M.Mədətovun kafedə "Hafka" ləqəbli iş adamı Hafiz Məmmədovun ünvanına söyüş söyməsi olub. Amma M.Mədətov bununla razılaşmayaraq deyib ki, H.Məmmədovu söyməyib: "Deyirəm ki, söyməmişəm. Mənə Emin zəng elədi. Dedim görüşüb danışarıq".

Qeyd edək ki, Bakı şəhər Prokurorluğun yaydığı məlumata görə, ötən il oktyabrın 14-də saat 19 radələrində Bakı şəhəri, Səbail rayonu, Ş.Şamil küçəsi 16 saylı ünvanda yerləşən çay evində naməlum şəxslər Mədətov Müşfiq İsrafil oğluna qarşı xuliqanlıq hərəkətləri edib ictimai qaydanı kobud surətdə pozaraq sonuncunu bıçağın dəstəyi ilə vurub ona xəsarət yetiriblər.

Həmin faktı üzrə Səbail Rayon Polis İdarəsinin İstintaq şöbəsində Cinayət Məcəlləsinin 221.2.1 (xuliqanlıq) və 221.3-cü (xuliqanlıq) maddələri ilə cinayət işi başlanıb.

Oktyabrın 15-də saat 04.00 radələrində həmin cinayət işi üzrə hadisəni törətmiş şəxslərin müəyyən edilməsi istiqamətində Səbail RPİ-nin əməkdaşları tərəfindən həyata keçirilən əməliyyat tədbirləri zamanı Bakı şəhəri, Nizami rayonu ərazisində “Leksus” markalı 90-LT-997 dövlət nömrə nişanlı avtomaşında olan şəxslər üzərlərində olan odlu silahlardan əməliyyat tədbirində iştirak etmiş polis əməkdaşlarına atəş açıb, nəticədə Səbail RPİ-nin Əməliyyat işləri üzrə rəis müavini, polis polkovniki Axundzadə Orxan Abdulla oğlu xəsarət alıb.

Hadisəni törədən şəxslər həmin avtomobillə hadisə yerindən qaçıblar.

Həmin fakt üzrə Nizami rayon Prokurorluğunda Cinayət Məcəllsinin 29,120.1-ci (qəsdən adam öldürməyə cəhd) maddəsi ilə cinayət işi başlanıb və hadisə yerinə baxış keçirilib. Hadisə yerindən 1 ədəd 12 mm və 6 ədəd 9 mm kalibrli gilizlər götürülüb və müvafiq ekspertizalar təyin edilib.

Cinayət işləri istintaqın davam etdirilməsi üçün Bakı şəhər Prokurorluğunun icraatına verilib.

Bakı şəhər Prokurorluğu və Bakı Şəhər Baş Polis İdarəsinin əməkdaşları tərəfindən aparılmış təxirəsalınmaz istintaq hərəkətləri və əməliyyat-axtarış tədbirləri nəticəsində qeyd olunan cinayət əməllərini törətməkdə şübhəli bilinənlər - 1992-ci il təvəllüdlü Abbasov Kazım Tapdıq oğlu, əvvəllər məhkum olunmuşlar - 1982-ci il təvəllüdlü İsmayılov Məhəmməd Həsən oğlu və 1976-cı il təvəllüdlü, Həsənov Emin Vaqif oğlu, Ramal Ağayev olması müəyyən edilib. Onlar Cinayət Məcəlləsinin 221.2.1, 221.3, 29, 120.2.3 və 315.2-ci (hakimiyyət nümayəndəsinə müqavimət göstərmə) maddələri ilə şübhəli şəxs qismində tutularaq istintaqa cəlb olunublar.

Xatırladaq ki, M.Mədətov 1991-ci ildən 1995-ci ilədək Azərbaycanın eks-prezidenti Heydər Əliyevin mühafizəçisi olub. O, daha sonra Nizami Rayon Polis İdarəsinin 23-cü Polis Bölməsinin rəisi vəzifəsində çalışıb. O, d aha sonra həbs edilib və 11 il müddətə azadlıqdan məhrum edilib. Prezident İlham Əliyevin əfv sərəncamı ilə azadlığa buraxılıb.