Anam Azərbaycanım,

Ərənləri yenilməz

Şərəflim-şanlım mənim!

Oba-oba qəddini

Dikəldən şah vüqarlı

Qarabağım-Cəbrayılım,

Böyük Mərcanlım mənim!

Hər qarış torpağını,

Daşını-kəsəyini,

Otunu, yarpağını

Əziziləyib öpüm qoy!

Yalını-yamacını,

Çölünü-çəmənini,

Xudafərin biçimli

Ulu sənət tacını

Gözlərimə təpim qoy!

Salam verib Diriyə,

Gəyəndən keçib gedim.

Xan Çinarlı Cəbrayılın

Kəhrizinin dumduru

Suyundan içib gedim.

Ağoğlandan boylanıb

Baxım Tumasa, Teyə.

Qanadlanan sevincim

Sığmasın yerə-göyə.

Çatsın səsim-avazım

Ulu Gordubabaya.

Göz aydınlığı verim

Hər elə, hər obaya.

Sirikdə, İsaxlıda

Qeyb olsun əbədilik

Dərdim, nisgilim, ahım.

Gəlişimə sevinsin

Hacı Qaraman Babam-

Qibləm-Ziyarətgahım...

Xoş günlərə qovuşsun

Zəngilanım, Füzulim,

Ağdərəm, Xocavəndim.

Qubadlıda, Laçında,

Ağdamda, Xocalıda

Dikəltsin qamətini

Heçə şəhərim, kəndim.

Xankəndində, Şuşada

Dil açsın toy-büsatım.

Üz tutsun Kəlbəcərə

Ağır elim-elatım...

Dönsün and yerimizə

Müqəddəs şəhid adı.

Sona çatsın yurdumda

Anaların naləsi,

Körpələrin fəryadı.

Deyim, xoşbəxtik, Vətən,

Sənin zəfər soraqlı

Ali Baş Komandanın,

Ərənlərin var olsun!

Dalğalansın hər yanda

Üçrəngli bayrağımız!

Uca Millətimizə

Ulu Tanrı yar olsun!

Mingəçevir şəhəri

    İSMAYIL MƏRCANLI  İMANZADƏ